Փորձագետ. Ի դեմս Իլհամ Ալիևի`Հայաստանը գործ ունի քաղաքական խելագարի հետ

• Շաբաթ, 9 հունիսի, 02:32

Ի դեմս Իլհամ Ալիևի`Հայաստանը գործ ունի քաղաքական խելագարի հետ: Նրա համար գոյություն չունի որևէ սկզբունք, առավել ևս`բարոյական նորմ: Մշտական դիվերսիաներ իրականացնելով`Ալիևը հակառակ է գնում է շատ սկզբունքների, որոնց պարտավոր է հավատարիմ մնալ ցանկացած քաղաքական գործիչ: Այդ մասին այսօր ԱԺ պատգամավոր Կարինե Աճեմյանի հետ համատեղ մամլո ասուլիսի ժամանակ հայտարարել է ՀՀ Պաշտպանության նախկին փոխնախարար Վահան Շիրխանյանը:

Նրա խոսքով, սահմանը երբեք հանգիստ չի եղել, և դիվերսիաներ իրականացվում են`1988 թվականից ի վեր, սակայն ժամանակի ընթացքում առավելությունը դանդաղ, բայց վստահորեն անցնում է Հայաստանի կողմը: Դա, նրա խոսքով, վերաբերում է համաշխարհային հանրության կողմից Հայաստանի օբյեկտիվ ընկալմանը: ՙՀայաստանի բախտը բերում է, որ  Ադրբեջանի առնչությամբ ԱՄՆ ունեցած  ծրագրերը հերթով ձախողվում են: Ադրբեջանը պետք է մի քանի հրահանգ կատարեր և փոխարենը ստանար Ղարաբաղը, սակայն դա իրեն ոչ մի կերպ չի հաջողվում: Իր գործողություններով Բաքուն ԱՄՆ-ից պահանջում է ղարաբաղյան հակամարտության շուտափույթ կարգավորում`համաձայն Մադրիդյան սկզբունքների՚,- հայտարարել է Շիրխանյանը:

Հայկական բանակը, փորձագետը խոսքով, բազում առավելություններ ունի ադրբեջանական բանակի հանդեպ: ՙԱդրբեջանի բանակը թաղված է կաշառակերության և անբարոյության մեջ: Այնտեղ ծառայում են զինվորներ, որոնք ատում են ալիևյան կլանը, և նման բանակը չի կարող հզոր լինել՚,- նշել է Շիրխանյանը:

Աճեմյանն իր հերթին նշել է, որ յուրաքանչյուր հայ զինվորի մահը ողբերգություն է ոչ միայն նրա ընտանիքի, այլ ընդհանուր առմամբ ողջ երկրի համար: ՙԲնականաբար, հարկավոր է համարժեք պատասխան տալ, սակայն մենք չպետք է ձգտենք սպանել որքան հնարավոր է շատ, այլ փորձենք հարցը լուծել խաղաղ ճանապարհով՚,- հայտարարել է նա:

Վերջին շաբաթվա ընթացքում Հայաստանի և Ադրբեջանի սահմանին և ղարաբաղյան ու ադրբեջանական ուժերի շփման գծում բախումներ են տեղի ունեցել ադրբեջանցի դիվերսանտների և հայ զինվորների միջև, ինչի հետևանքով ոչնչացվել է ադրբեջանցի 25 դիվերսանտ: Հայկական կողմից կա չորս զոհ և ութ վիրավոր: