Փորձագետ. ՀՀ կառավարության բաժնետոմսերի 20 տոկոսի վաճառքը ՀՀ գազաբաշխիչ ցանցի օպերատոր ՙՀայՌուսգազարդ՚ ընկերությանն արդիական չէ

• Երեքշաբթի, 28 օգոստոսի, 19:24

 ՀՀ կառավարության բաժնետոմսերի 20 տոկոսի վաճառքը ՀՀ գազաբաշխիչ ցանցի օպերատոր ՙՀայՌուսգազարդ՚ ընկերությանն արդիական չէ, և նման խնդիր չկա, օգոստոսի 28-ին մամուլի ասուլիսում հայտարարել է ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը (ՀՀԿ խմբակցություն), պատասխանելով Հայաստանի տնտեսության վրա Հայաստան ներմուծվող ռուսական գազի գների հնարավոր բարձրացման ազդեցությանը և գների բարձրացման դիմաց ՀՀ կառավարության բաժնետոմսերի 20 տոկոսը ՀՀ գազաբաշխիչ ցանցի օպերատոր ՙՀայՌուսգազարդ՚ ընկերությանը վաճառելու նպատակահարմարությանն առնչվող  ԱրմԻնֆոյի  թղթակցի հարցին:

Նա նաև հիշեցրել է ՀՀ և ՌԴ նախագահներ Սերժ Սարգսյանի և Վլադիմիր Պուտինի վերջին մոսկովյան հանդիպման շրջանակում անցկացված մամուլի ասուլիսում հնչած այն կարծիքը, որ ռուսական գազի գինը պետք է լինի այնպիսին, որպեսզի, մի կողմից, այն համապատասխանի կողմերի տնտեսական շահերի տրամաբանությանը, իսկ մյուս կողմից` որպեսզի համապատասխանի գազի գներին տարածաշրջանում:

Հիշեցնենք, որ Հայաստանում գազի սակագներն ավելի քան երկու տարի չեն փոխվել: Ավելի վաղ էներգետիկայի և բնական պաշարների նախարարությունում հաղորդել էին Ռուսաստանից Հայաստան մատակարարվող գազի սակագների շուրջ Երևանի և Մոսկվայի միջև ընթացող բանակցությունների մասին: Հայկական ԶԼՄ-ների համաձայն, ՙԳազպրոմը՚ մտադիր է 2012 թվականի հոկտեմբերի 1-ից Հայաստանի համար 1000 խմ գազի գինը ներկայիս 180 դոլարից բարձրացնել մինչև 280 դ ոլար, իսկ 2013 թվականի հունվարից` մինչև 320 դոլար:

Նշենք նաև, որ ՙԳազպրոմ՚ ԲԲԸ ՙՀայՌուսգազարդ՚ ՀՁ բաժնետոմսերի 80 տոկոկսի սեփականատերն է, իսկ բաժնետոմսերի 20 տոկոսը պատկանում է Հայաստանի կառավարությանը: