Էկոլոգներն ահազանգում են. Սևանում սիգի պաշարները կազմում են ընդամենը 8 տոննա

• Շաբաթ, 21 ապրիլի, 13:33

Սիգի պաշարների կտրուկ կրճատման հետ կապված իրավիճակը Սևանի հերթական փորձանքն է դարձել:

ՙՍիգի պաշարները 2011 թվականին կազմել են ընդամենը 8-8.5 տոննա, մինչդեռ 2010 թվականին այդ ցուցանիշը կազմել է 180 տոննա: Խոսքն արդեն վերաբերում է պոպուլյացիայի ոչնչացմանը՚,- ԱրմԻնֆո-ի հետ զրույցում նշել է ՀՀ ԳԱԱ Հիդրոէկոլոգիայի եւ ձկնաբանության ինստիտուտի տնօրեն Բարդուխ Գաբրիելյանը:

ՙԵթե առաջ ասում էինք, որ ձկնկիթի և մանրաձկների պոտենցիալը բավարար է պոպուլյացիայի վերարտադրության համար, ապա հիմա հակառակ իրավիճակն է: Այդ պատճառով պոպուլյացիայի վերականգնման համար հարկավոր է մտածել այլ վայրերից ձուկ բերելու մասին՚,-հայտարարել  է փորձագետը: Գաբրիելյանը հիշեցրել է, որ խորհրդային տարիներին սիգ էր բերվում Լադոգի և Չուդի լճերից: Տասնամյակների ընթացքում Սևանում սիգը ձեռք է բերել հիբրիդային ձև: ՙՀետագայում մեզանից ձկնկիթ էին վերցնում Չելյաբինսկի ջրամբարի համար, այնպես որ`փաստացի այնտեղ կա մեր սիգի հիբրիդացված տեսակը: Կարծում եմ, որ հիմա կարելի է Հայաստան սիգ ներմուծել հենց այնտեղից՚,- ասել է նա:

Նրա խոսքով, սիգի պաշարների կրճատման հետ կապված կրիտիկական վիճակը քննարկվել ՀՀ Բնապահպանության նախարարության հետ: ՙԲայց հատկապես որտեղից մենք պետք է սիգ ներմուծենք, այդ մասին դեռ խոսակցություն չի եղել՚,- նշել է Գաբրիելյանը: