ԼՂՀ նախագահի թեկնածու Վիտալի Բալասանյանի շտաբի ներկայացուցիչ. Արցախի ընտրություններն ազատ էին, բայց ոչ արդար

• Երկուշաբթի, 23 հուլիսի, 12:51

Արցախի ընտրություններն ազատ էին, բայց ոչ արդար, այսօր մամլո ասուլիսի ժամանակ այդպիսի կարծիք է հայտնել «Արցախի եվրոպական շարժումե հասարակական կազմակերպության նախագահ, ԼՂՀ նախագահի թեկնածու Վիտալի Բալասանյանի շտաբի ներկայացուցիչ Հայկ Խանումյան:

Նրա խոսքով, ընտրությունների ընթացքի վրա մեծ չափով ազդել է վարչական ռեսուրսը: ՙԻնչպես է ստացվել, որ գյուղերում, որտեղ Վիտալի Բալասանյանն ունեցել է վստահված անձինք, նա հաղթել է, իսկ այն գյուղերում, որտեղ չի ունեցել վստահված անձինք, զրո ձայն է ստացել՚,- հռետորական հարց է տալիս Խանումայնը:

Նրա խոսքով, ամբողջ ԼՂՀ-ում վախի մթնոլորտ է տիրում: ՙՄարդիկ ուղղակի վախեցել են այցելել Բալասանյանի նախընտրական հանրահավաքներին, իսկ նրանք, ովքեր հուլիսի 19-ին քվեարկել են Բալասանյանի օգտին, մեծ ռիսկի են դիմել, քանի որ ԼՂՀ-ում 2007 թվականից ընդդիմություն չի եղել՚,- հայտարարել է Խանումյանը: Մեկնաբանելով այն փաստը, որ Բալասանյանն ընտրություններում ստացել է ձայների 33 %-ը, Խանումյանը նշել է, որ ժողովուրդը պատրաստ է ընդունել ընդդիմությանը: Այդ առնչությամբ նա նշել է, որ ԼՂՀ-ում ստեղծվում է նոր քաղաքական ընդդիմադիր ուժ, որն անպայման մասնակցելու է 2015 թ. կայանալիք խորհրդարանական ընտրություններին, ինչպես նաև տեղական ինքնակառավարման մարմինների ընտրություններին: