Երևանում տեղի կունենան ՙՀարսնաքարում՚ դաժան ծեծի ենթարկված ռազմական բժշկի հիշատակին նվիրված ակցիաներ

• Շաբաթ, 30 հունիսի, 19:03

ՙՍարդարապատ՚ շարժումն արժանապատվություն ունեցող և ապագայի մասին մտահոգ բոլոր քաղաքացիներին կոչ է անում համախմբվել և Վահե Ավետյանի հուղարկավորության արարողությունը վերածել համաժողովրդական սգո և լուռ ցասումի միջոցառման:

Նախաձեռնության կողմից տարածված հաղորդագրության մեջ ասվում է, որ միջոցառման նպատակն է հոգևոր ու բարոյական աջակցությամբ մեղմել զոհվածի հարազատների` հանցավոր ամենաթողության դեմ անզորությունից բազմապատկված վիշտը, ինչպես նաև վարչախմբին հստակ և վճռական կերպով ցույց տալ, որ հայ ժողովուրդն այլևս ինքնակազմակերպվելով տեր է կանգնում երկրին ու իշխանությանը և օրենքին համապատասխան պատժելու է բոլոր հանցագործներին: ՙՍարդարապատե շարժման նախաձեռնող խումբը բոլոր մտահոգ մարդկանց առաջարկում է այսօր` ժամը 17:00-ին հավաքվել Ազատության հրապարակում` Վահե Ավետյանի հուղարկավորության կազմակերպման հանրային հանձնաժողով ստեղծելու նպատակով: Իսկ վաղը (30.06.2012) ժամը 21:00 Հարսնաքարի դիմաց, տեղի կունենա մոմավառություն՝ ի հիշատակ Վահե Ավետյանի։

Նշվում է, որ այս ակցիան նպատակ ունի ցույց տալու մեր բոլորիս վճռականությունը և կամքը, որ մենք անտարբեր չենք լինելու նման անօրինությունների ու ինքնադատաստանի երևույթի նկատմամբ: Մենք պայքարելու ենք այնքան, որ բոլոր մեղավորները խստագույնս պատժվեն և ՀՀ քաղաքացին մեր երկում իրեն զգա պաշտպանված և անվտանգ, ինչպես ամրագրված է ՀՀ Սահմանադրությունում: Նման դեպք կարող է պատահել յուրաքանչյուրիս հետ: Մեր մասնակցությունը սոլիդարության և ապագայում նման դեպքեր բացառելու հարց է:

ՙՏեղեկացնում ենք նաև, որ մոմավառության ակցիայի օրվա, վայրի, ժամի մասին տարածվող այլ տեղեկություններն ըստ էության մի խումբ անձանց կողմից իրականացվող սադրիչ գործողություններ են, որոնք նպատակ ունեն շեղելու և մոլորեցնելու հասարակությանը: Ուստի լրատվամիջոցներին կոչ ենք անում ապատեղեկատվության տարածման մասնակիցը չդառնալ և զերծ մնալ չճշտված տեղեկատվության տարածումից՚,-ասված է հաղորդագրության մեջ:

Հիշեցնենք, որ հունիսի 17-ին ՀՀ պատգամավոր Ռուբեն Հայրապետյանին պատկանողՙՀարսնաքար՚ ռեստորանում դաժան ծեծի էին ենթարկվել ՀՀ ռազմական հոսպիտալի բժիշկներ, մայոր Վահե Ավետյանը, բժիշկ Արտակ Բայադյանը և ավագ լեյտենանտ Գարիկ Սողոմոնյանը: Ըստ լրատվամիջոցների կողմից տարածված լուրերի, Վահե Ավագյանն ու Արտակ Բայադյանը ռեստորան են այցելել սպորտային համազգեստով, սակայն ռեստորանի անվտանգության ծառայողները նրանց թույլ չեն տվել ներս մտնել: Ավելի ուշ, բժիշկները հագուստները փոխելով նորից են վերադարձել: Սակայն, միջադեպը տեղի է ունեցել մատուցողի և բժիշկների միջև, որից հետո վիճաբանությանը միջամտել են անվտանգության ծառայության աշխատակիցները, որոնք նախապես, հեռախոսով, միջադեպի մասին հայտնել են Ռուբեն Հայրապետյանին, որն էլ հրամայել է ՙդաստիարակել՚ երիտասարդներին: Ծանրագույն վիճակում Ավետյանը տեղափոխվել է հոսպիտալ, որտեղ կատարվել է գլխուղեղի վիրահատություն, և որտեղ էլ հունիսի 29-ին նա վախճանվել է:

ՀՀ Քրեական Օրենսգրքի 112 Հոդվածի հատկանիշներով հարուցված քրեական գործը ՊՆ քննչական բաժնից ՀՀ գլխավոր դատախազ Աղվան Հովսեփյանի կարգադրությամբ տեղափոխվեց Երևանի ոստիկանության քննչական վարչություն: Արդեն ձերբակալվել է 6 մարդ, այդ թվում` ռեստորանի անվտանգությա ծառայության 2 աշխատակիցները, ռեստորանի մենեջերը և մատուցողը: Ձերբակալվածների թվում է նաև ռեստորանի անվտանգության ծառայության աշխատակից Գարիկ մարգարյանը, ում լուսանկարները հրապարկվել էին լրատվմիջոցներում, նշելով, որ ռազմական բժիշկներին հիմնականում նա է ծեծի ենթարկել: ՀՀ ոստիկանապետ Վլադիմիր Գասպարյանը և ՀՀ պաշտպանության նախարար Սեյրան Օհանյանը մինչ այդ հայտարարել էին, որ մեղավորները կպատժվեն օրենքի ամենայն խստությամբ, սակայն, արդյո՞ք դա տեղի կունենա, ինչն էլ առաջացնում է մեր բազմաթիվ քաղաքացիների կասկածը: