Վրաստանի պետբյուջեից շուրջ 15 մլն դոլար է հատկացվել Ախալցխայում ՙՌաբաթ՚ համալիրի վերականգնման համար, հաղորդում է Black Sea Press-ը

• Հինգշաբթի, 16 օգոստոսի, 18:04

 Օգոստոսի 16-ին Վրաստանի Սամցխե-Ջավախք տարածաշրջանի Ախալցխա քաղաքում տեղի կունենա վերականգնված ՙՌաբաթ՚ պատմական ամրոցի հանդիսավոր բացումը աշխարհահռչակ շանսոնյե Շառլ Ազնավուրի և Վրաստանի բարձրագույն ղեկավարության մասնակցությամբ:

Ինչպես հաղորդում է Black Sea Press գործակալությունը, ամրոցի տարածքում ժողովրդական զբոսանքը կսկսվի Վրաստանի մնջախաղի և մատների թատրոնների ելույթներով: Շառլ Ազնավուրի մեկուկես ժամանոց համերգն ամրոցի տարածքում կսկսվի ժամը 20:00-ին: Միջոցառումը կավարտվի հրավառությամբ:

Աղբյուրը նաև հաղորդում է, թե Վրաստանի պետական բյուջեից ավելի քան 26 մլն լարի (շուրջ 15 մլն դոլար) է հատկացվել միջնադարյան ՙՌաբաթ՚ համալիրի վերականգնման համար: Այն զբաղեցնում է 7 հա, որտեղ ՙհանդիպում են վրացական, թուրքական և ռուսական ճարտարապետության նմուշներ՚: ՙՀամալիրում Սուրբ Մարինեի ուղղափառ եկեղեցու կողքին կանգնած են մզկիթ, կաթոլիկ եկեղեցի, սինագոգ և հայկական եկեղեցի՚, - հաղորդում է Black Sea Press-ը: