ՄԻԵԴ-ը Հայաստանին պարտավորեցրել է փոխհատուցում վճարել երկու նախկին կալանավորների

• Չորեքշաբթի, 27 հունիսի, 21:48

Մարդու իրավունքների եվրոպական դատարանը հունիսի 26-ին Հայաստանի դեմ միանգամից երկու վճիռ է կայացրել: Ինչպես հաղորդում է ՙՀայկական ժամանակ՚ թերթը, դրանցից մեկը նախկին քաղբանտարկյալ, Հայ ազգային կոնգրեսի անդամ Վարդան Մալխասյանի դեմ հարուցված քրեական գործի մասին է: Եվրադատարանն իր վճռով արձանագրել է, որ Վարդան Մալխասյանը, 2006-ի դեկտեմբերի 9-ից մինչև նրա վերաբերյալ դատավճիռ կայացնելը` շուրջ 8 ամիս, կալանքի տակ պահվել է Մարդու իրավունքների եվրոպական Կոնվենցիայի խախտմամբ: Եվրադատարանը վճռել է, որ Վարդան Մալխասյանի իրավունքների խախտման համար, որպես փոխհատուցում, ՀՀ կառավարությունը նրան պետք է վճարի 4 հազար 500 եվրո:

Մյուս գործը ևս 2006-ին սկսված և 2007-ի տարեվերջին իր հանգուցալուծումը գտած գործ է, որի հիման վրա ՀՀ կառավարությունը պարտավոր է Ալավերդու բնակիչ Կամո Փիրուզյանին վճարել 8 հազար եվրո փոխհատուցում: Սպանության փորձի և ավազակային հարձակման մեղադրանքով նա մեկ տարի երկու ամիս պահվել է կալանքի տակ, հետո` արդարացվել: Եվրադատարանը վճռել է, որ Փիրուզյանը կալանքի տակ է պահվել Կոնվենցիայի խախտմամբ:

Հիշեցնենք, որ Փիրուզյանի գործի վերաբերյալ որոշումը այս ամսվա ընթացքում ՄԻԵԴ երրորդ որոշումն է Հայաստանի քաղաքացիների օգտին. հունիսի 5-ին ՄԻԵԴ  Հայաստանի կառավարությանը պարտավորեցրել էր 6 հազար եվրո փոխհատուցում վճարել ՙՆուբարաշենի՚ ՔԿՀ կալանավոր Արարատ Մուրադխանյանին: Ավելի վաղ ԱրմԻնֆոյի թղթակցի հետ զրույցում Հայաստանի մարդու իրավունքների պաշտպան Կարեն Անդրեասյանը հայտարարել էր, որ անարդար դատավճիռները վնասում են Հայաստանի հեղինակությանը ՄԻԵԴ-ում: Նրա ասելով, ընդդեմ պետության Հայաստանի քաղաքացիների դատական հայցերի քանակն զգալի է, և ցավոք սրտի` պետութան համար, այդ հայցերի առնչությամբ որոշումներ են կայացվում, հիմնականում, ոչ ՀՀ օգտին: