Սեպտեմբերի 8-ին Հայաստանում կանցկացվի խորովածի փառատոն

• Երեքշաբթի, 28 օգոստոսի, 18:19

Սեպտեմբերի 8-ին Հայաստանում, Ախթալայի վանքի մերձակայքում, կանցկացվի խորովածի փառատոն: Այդ մասին ԱրմԻնֆո գործակալությանը հաղորդել է ՙՀայ խոհարարական ավանդույթների զարգացման և պահպանման՚ ՀԿ նախագահ Սեդրակ Մամուլյանը:

Փառատոնը կազմակերպվում է արդեն չորրորդ անգամ: Խոհարարական իրադարձության հյուրերը հնարավորություն կստանան ոչ միայն վայելել համեղ խորոված, այլև ներկա լինել ազգային երգ ու պարի համույթների ելույթներին: Հետաքրքիր է, որ նախորդ տարիներին փառատոնն ի հայտ է բերել խորովածի բավականին հետաքրքիր բաղադրատոմսեր: Համեմունքների  նոր խառնուրդներ, միջուկների կիրառում, մրգերի և բանջարեղենի անսովոր համադրումներ: Մամուլյանը հիշեցրել է, որ առաջին փառատոնի արդյունքների վերաբերյալ հրատարակվել է խորովածի բաղադրատոմսերի գիրք: 2010 և 2011 թթ. փառատոնների, ինչպես նաև սեպտեմբերին կայանալիք իրադարձության բաղադրատոմսերը նույնպես տեղ կգտնեն առանձին հրատարակությունում:

Այս տարի փառատոնին կմասնակցի շուրջ 15 ռեստորան: 2011 թվականի փառատոնում գործում էր 18 տաղավար, իսկ մասնակիցների թիվը գերազանցել էր բոլոր սպասումները` մինչև 10 հազար մարդ: ՙՄեր նպատակներից մեկը այդ տարածաշրջանը զբոսաշրջիկների համար գրավիչ դարձնելն է: Ախթալայում կան բազմաթիվ պատմամշակութային հուշարձաններ, սակայն խոհանոցը նույնպես տուրիստական ապրանք է՚, - նշել է  Մամուլյանը: Նրա ասելով, առաջիկա միջոցառմանը կմասնակցեն նաև պաշտոնական անձինք և երկրում հավատարմագրված դիվանագիտական առաքելութունների ներկայացուցիչներ: Այսպես, նախնական պայմանավորվածություն է ձեռք բերվել Հայաստանում Վրաստանի և ԱՄՆ դեսպանների հետ:

Նախորդ փառատոնից այս փառատոնի տարբերություններից մեկը կլինի այն, որ այն այցելել ցանկացողները ստիպված կլինեն մինչև Ախթալա հասնել ինքնուրույն: ՙԱնցյալ տարի մենք ձգտում էինք փառատոնի հյուրերին ապահովել փոխադրամիջոցներով, սակայն այցելուների աննախադեպ հոսքի առնչությամբ մենք բախվեցինք որոշ դժվարությունների՚, - խոստովանել է Մամուլյանը: Նա նաև հույս է հայտնել, որ միջոցառումը կօգնի միջոցներ գտնել վանքի հարակից տարածքի բարեկարգման հարցերը լուծելու համար: Ուշագրավ է, որ 2011 թվականին ընթացած փառատոնը օգնեց գտնել մարդկանց, ովքեր ցանկություն են հայտնել իրենց հաշվին վերականգնել եկեղեցու գմբեթը: