Ալեքսանդր Սոկուրովը կարժանանա Հայ առաքելական եկեղեցու սահմանած մրցանակին

• Հինգշաբթի, 5 հուլիսի, 15:19

 Այսօր` հուլիսի 4-ին ՙՈսկե ծիրան՚ Երևանի 9-րդ միջազգային կինոփառատոնը հանդես եկավ փառատոնի բացմանն ընդառաջ մամլո ասուլիսով: Ասուլիսը ներկայացրեց Հայ առաքելական եկեղեցու սահմանած ՙԵղիցի լույս՚ մրցանակը:

ՙՈսկե ծիրան՚ Երևանյան 9-րդ միջազգային կինոփառատոնի շրջանակներում պատմության մեջ առաջին անգամ կհանձնվի հատուկ մրցանակ հոգևոր, մշակութային և մարդասիրական արժեքների քարոզչության և համաշխարհային կինոարվեստում բերած նշանակալի ավանդի համար: Մրցանակն անվանվել է ՙԵղիցի լույս՚ և սահմանված է Հայ առաքելական եկեղեցու կողմից: ՙԵղիցի լույս՚ առաջին մրցանակը կշնորհվի աշխարհահռչակ ռուս կինոռեժիսոր Ալեքսանդր Սոկուրովին:

Ժամանակակից ամենանշանավոր կինոռեժիսորներից մեկը` Ալեքսանդր Սոկուրովը շուրջ 20 վավերագրականների հեղինակ է և հատկապես հայտնի է իր խաղարկային ֆիլմերով: Խորհրդային տարիներին հաճախ ենթարկվելով ժամանակի իշխանությունների ճնշումներին` Սոկուրովի հռչակը վերելք ապրեց միայն Միության փլուզումից հետո, երբ նրա ֆիլմերն սկսեցին արժանանալ Կաննի, Բեռլինի, Լոկառնոյի, Մոսկվայի, Տորոնտոյի, Վենետիկի և եվրոպական այլ առաջնակարգ կինոփառատոների մրցանակների:

ՙՈսկե ծիրան՚ Երևանի 9-րդ միջազգային կինոփառատոնը ՙՌետրոսպեկտիվ՚ ծրագրով  կներկայացնի Սոկուրովի քառերգություն կազմող ֆիլմերը, մասնավորապես` 20-րդ դարի երեք տիրակալների` Լենինի, Հիտլերի և Հիրոհիտոյի մասին պատմող ՙԱրև՚ (2005թ.), ՙՄողոք՚ (2008թ.) և ՙՑուլ՚ (2001թ.) ֆիլմերը, ինչպես նաև քառերգությունն ամփոփող ՙՖաուստ՚ ֆիլմը, որ 2011-ին արժանացել է Վենետիկի կինոփառատոնի գլխավոր` ՙՈսկե առյուծ՚ մրցանակին:

Հիշեցնենք, որ Սոկուրովը նախկինում արժանացել է ՙՈսկե ծիրան՚-ի գլխավոր մրցանակի (ՙԱրև՚, 2005թ., Գլխավոր մրցանակ. լավագույն խաղարկային ֆիլմ),  սակայն Հայաստան այս տարի կայցելի առաջին անգամ: ՙԵղիցի լույս՚ մրցանակ-արձանիկի հեղինակը ճանաչված դիզայներ Նուռն է: