Քաղաքագետ. Մինչև Եվրասիական միությանն անդամակցելը Հայաստանը պետք է ուսումնասիրի բոլոր առավելություններն ու թերությունները

• Երեքշաբթի, 28 օգոստոսի, 18:18

 Հայաստանում անհրաժեշտ է ձևավորել հատուկ փորձագիտական խումբ, որը կուսումնասիրի Եվրասիական միությանն անդամակցման դրական և բացասական կողմերը, այսօր մամլո ասուլիսի ժամանակ այդպիսի կարծիք է հայտնել քաղաքագետ Լևոն Շիրինյանը:

Նրա խոսքով, տվյալ պահին Հայաստանը պետք է ուշադրությամբ հետևի Եվրասիական միության ձևավորման գործընթացներին և շարունակի համագործակցությունն Արևմուտքի հետ: Նա նաև նշել է, որ պետք չէ հրաժարվել կոմպլեմենտար քաղաքականությունից, քանի որ Ռուսաստանին Եվրասիական միությունում պետք չեն լինի չզարգացած պետություններ, որոնցից է տվյալ պահին Հայաստանը: ՙՄենք կարող ենք օգտագործել բարդ իրավիճակը Մեծ Մերձավոր Արևելքում, որտեղ Ռուսաստանի հենակետերն են Հայաստանը և Սիրիան, և որոշակի շահաբաժիններ ստանալ դրանից՚,- նշել է նա:

Քաղաքագետը նաև նշել է, որ Հայաստանը կարող է օգտագործել Վրաստանի և Ադրբեջանի արևմտամետ կողմնորոշումը`Ռուսաստանի հետ վերջնական մերձեցման նպատակով: Բացի այդ, քաղաքագետը գտնում է, որ Եվրասիական միության շրջանակներում հայ-ռուսական հարաբերությունների հետագա ամրապնդումը խոչընդոտներ կստեղծի ռուս-թուրքական հարաբերությունների խորացման ճանապարհին: ՙԵրևանի համար դա շատ կարևոր է, քանի որ ռուս-թուրքական մերձեցումը կարող է տեղի ունենալ հայկական կողմի շահերի հաշվին, ինչպես արդեն եղել է 20-րդ դարի սկզբին՚,- նշել է նա: