Պարզվում է` պետության կողմից դիզելային վառելիքի սուբսիդավորումը պահանջված չէր

• Ուրբաթ, 17 օգոստոսի, 17:53

Պարզվեց, որ պետության կողմից սուբսիդավորված դիզելային վառելիքի խմբաքանակը մասամբ պահանջված չէ շուկայում:

1 լ դիմաց ներկայիս 460 դրամ շուկայական գնի փոխարեն 350 դրամ գնով դիզելային վառելիքի մատակարարումները Հայաստանի կառավարությունը հանձնարարել էր ՙՖլեշ՚ ընկերությանը: Նախատեսվում էր իրացնել շուրջ 12-14 հազար տոննա ցածր գներով դիզելային վառելիք, սակայն ֆերմերները գնել են այդ ծավալի շուրջ 85-90 տոկոսը: Նավթամթերքի առևտրով զբաղվող ընկերությունը պատրաստ էր տրամադրել վառելիքի ողջ ծավալը, սակայն առաքումների գործընթացը մշտապես ձգձգվում էր գյուղացիների շրջանում ֆինանսավորման և պահեստավորման հնարավարությունների բացակայության առնչությամբ: Ուշագրավ է, որ նույնիսկ 1 լ դիմաց 350  դրամ գնով վառելիքը պահանջված չէր: 2012 թվականի առաջին եռամսյակում կառավարությունը բյուջեից 1,3 մլրդ դրամ էր հատկացրել դիզելային վառելիքի գների սուբսիդավորման համար, ինչի մասին որոշում էր կայացվել 2012  թվականի փետրվարի 2-ի նիստում:

Մասնագետների կարծիքով, ծրագրի իրագործմանն ինչ-որ չափով խոչընդոտեցին մայիսի խորհրդարանական ընտրությունները: Ընտրությունների նախաշեմին դիզելային վառելիքի սուբսիդավորման մասին կառավարության որոշումը քաղաքական ուժերը մեկնաբանել են որպես քաղաքական շահաբաժիններ վաստակելու և ընտրույթուններում լրացուցիչ ձայներ ապահովելու իշխանությունների ցանկություն: Սակայն էժան վառելիքի վաճառքից քաղաքական շահաբաժին էր որոշել վաստակել նաև ԲՀԿ-ն: Ի հեճուկս կառավարության` ընտրությունների նախօրեին գյուղացիներին առաջարկվել էր ավելի ցածր գին, սակայն այդ դիզելային վառելիքը նույնպես շուկայում պահանջված չէր, այս անգամ` ցածր որակի պատճառով: Հիշեցնենք, որ ՙՖլեշը՚ դիզվառելիքը  Հայաստան է ներկրում Ռուսաստանից, իսկ ԲՀԿ փորձում էր վաճառել Իրանից գնված և Իրաքում արտադրված դիզվառելիք: Իշխանությունները հայտարարել են, թե մտադիր են դիզելային վառելիքը ֆինանսավորել նաև հաջորդ տարի, ի դեպ, դարձյալ ընտրությունների նախաշեմին, այս անգամ` նախագահական: