Փորձագետ. Հայաստանի իշխանություններն անգործության են մատնված ադրբեջանցիների կողմից հայկական պատմական հուշարձանների ավերման հարցում

• Հինգշաբթի, 14 հունիսի, 00:19

 Տարեցտարի ավելանում է երկրի տարածքից դուրս, մասնավորապես, Ղարաբաղի` ադրբեջանցիների կողմից զավթված տարածքներում քանդվող հայկական ճարտարապետական հուշարձանների թիվը: Սակայն Հայաստանի իշխանություններն անգործության են մատնված հայկական պատմական հուշարձանների ոչնչացման համար Ադրբեջանի նկատմամբ պատասխան միջոցներ ձեռնարկելու հարցում: Այդ մասին այսօր մամլո ասուլիսի ժամանակ լրագրողներին հաղորդել է հուշարձանագետ Սամվել Կարապետյանը:

ՙԱդրբեջանական իշխանությունների հակահայկական քաղաքականության օբյեկտ են դարձել նույնիսկ Լեռնային Ղարաբաղի պատմական հուշարձանները: Ոչ ամբողջական տվյալներով, Լեռնային Ղարաբաղի ինքնավար մարզի պատմաճարտարապետական հուշարձանների ընդհանուր թիվը հասնում է առնվազն 1700-ի՚,- հայտարարել է փորձագետը: Նրա խոսքով, քանդված ճարտարապետական կառույցների մեծ մասը կազմել են եկեղեցիներ և վանական համալիրներ, որոնք ոչ միայն չեն ընդգրկվել է ադրբեջանական կառավարության կողմից հաստատված`պետության հսկողության տակ գտնվող հուշարձանների ցուցակում, այլ նաև Ադրբեջանի գիտությունների ակադեմիայի հատուկ հանձնաժողովի կողմից դասվել են ՙանցյալի վտանգավոր կրոնական կենտրոնների՚ շարքին:

Փորձագետի կարծիքով, ադրբեջանցիների բոլոր այդ գործողություններն ուղղված էին արհեստականորեն պատրանքի ստեղծմանը, թե իբր Ղարաբաղը Հայաստանի մաս չի կազմել: Այնուամենայնիվ, Կարապետյանը նշել է, որ հայերը չեն հասկանում պատմական հուշարձանների կարևորությունը. ՙՊատկերացնում եք,  թե ինչ կանեին ադրբեջանցիները, եթե թեկուզ 1% ադրբեջանական հուշարձաններ ունենային Ղարաբաղի տարածքում՚,- հռետորական հարց է տալիս Կարպետյանը: Միաժամանակ փորձագետը նշել է, որ այսօր նավթն ավելի մեծ դեր է խաղում, քան ճարտարապետության հուշարձանները: