Թեժսարի հանքավայրը` էկոլոգիական նոր սպառնալիք

• Չորեքշաբթի, 1 օգոստոսի, 14:45

Ըստ երևույթին, Հայաստանին էկոլոգիական նոր վտանգ է սպառնում: Խոսքը վերաբերում է Թեժսարի նեֆելինային սիենիտների հանքավայրին, որի շահագործումը ռիսկեր է պարունակում ջրային պաշարների և պահպանվող տարածքների համար:

Ինչպես ԱրմԻնֆո-ի հետ զրույցում նշել է Հայաստանի կանաչների միության ղեկավար Հակոբ Սանասարյանը, հանքավայրի շահագործումը կհանգեցնի Որոտան, Արփա, Դարբ գետերի աղտոտմանը: Փորձագետը նշել է, որ ծանր մետաղները Որոտան գետի և Կետչուտի ջրամբարի միջոցով կարող են հասնել նաև մինչև Սևան: Փորձագետը ուշադրությունը հրավիրել է նաև այն բանի վրա, որ այդ նույն ջրերով են ոռոգվելու Եղեգնաձոր և Վայք քաղաքների հողահանդերը, ինչի հետևանքով թունավոր նյութերը կարող են ներթափանցել նաև գյուղատնտեսական արտադրանքի մեջ: 

Ոչ պակաս մտահոգիչ է նաև այն, որ պոչանքները, այսինքն`հանքաքարի հարստացման թափոնները, գտնվելու են Որոտան գետի ձախ ափին, ինչը բազմակի անգամ բարձրացնում է էկոլոգիական ռիսկերը: WWF-Հայաստանի ղեկավար Կարեն Մանվելյանն իր հերթին ուշադրությունը հրավիրել է այն բանի վրա,որ հանքավայրի շրջանում են գտնվում Մեղրաձորի և Արզականի, ինչպես նաև Հանքավանի ջրաբանական արգելավայրերը:

Հանքավայրը պատրաստվում է շահագործել «Ալյումինա Քորփորեյշնե ընկերությունը: Նախագծի շուրջ հանրային լսումներ են անցկացվել հուլիսի 26-ին Արտավազ գյուղում: ՙէկոԼուրը՚ նշում է, որ սա այս նախագծի վերաբերյալ անցկացվող երրորդ լսումն էր: Առաջին անգամ լսումները հետաձգվեցին  անհայտ պատճառներով: Երկրորդ անգամ համարվեցին չկայացած «Ալյումինա Քորփորեյշնե ընկերության իրավասու ներկայացուցիչների բացակայության պատճառով: Հուլիսի 26-ին պարզվեց, որ նախագծային փաստաթղթերում բացակայում են համայնքների հետ կնքված պայմանագրերը` հողհատկացման վերաբերյալ: Չկա  ՀՀ էներգետիկայի եւ բնական պաշարների նախարարության տրամադրած արտոնագիրը: