Հայաստանի քրդական համայնքի ղեկավար. Շուտով քրդական ինքնավարություն ստեղծմանը պետք է սպասել ոչ միայն Սիրիայոււմ, այլ նաև Թուրքիայում

• Ուրբաթ, 17 օգոստոսի, 17:53

Սիրիայում ապրող քրդերը չեն աջակցում ոչ իշխանություններին, ոչ էլ ընդդիմությանը, նրանք պայքարում են հանուն ինքնավարության, որն անպայման կստանան, անկախ այդ երկրում տիրող ներքաղաքական ճգնաժամային մթնոլորտից: ԱրմԻնֆո գործակալության թղթակցի հետ զրույցում նման կարծիք է արտահայտել Հայաստանի քրդերի համայնքի ղեկավար, Կնյազ Հասանովը:

Նրա խոսքերով, Սիրիայում ստեղծված են ինքնավարության հաստատման բոլոր նախադրյալները: ՙՔրդերն ինքնավարություն կստանան ճգնաժամի ցանկացած ավարտի դեպքում, ինչպես իշխանությունների հաղթանակի` քանի որ նախագահ Ասադի պլաների մեջ ընդգրկված է այդ սցենարը, այնպես էլ ընդդիմության հաղթանակի դեպքում, որը չի կարող հաշվի չնստել քրդական հզոր` 3-4 միլիոնանոց համայնքի հետ՚,-հայտարարել է նա, ընդգծելով, որ ոչ Արևմուտքը, և ոչ էլ ԱՄՆ-ը, ի վիճակի չեն խանգարել Սիրիայում քրդական ինքնավարության ստեղծմանը: Հասանովը նշել է նաև, որ ստեղծված են բազմահազարանող քրդական ջոկատներ, որոնք մինչև վերջ կպայքարեն հանուն իրենց գաղափարների իրականացման: ՙՔրդերը Սիրիայում ճնշված էին: Անգամ այսօր, քրդերի անձնագրերում ազգության դիմաց գրվում է` արաբ, բայց Սիրիայում կա 6-7 քրդաբնակ մեծ քաղաք: Մենք հասել ենք նրան, որ ներկայումս սիրիական դպրոցներում անց են կացվում քրդերենի դասեր՚,-տեղեկացրել է նա:

Հասանովը նշել է, որ Սիրիայում արդյունքի հասնելով, քրդերը կակտիվացնեն իրենց պայքարը նաև Թուրքիայում: ՙԻրաքում մենք արդեն ունենք ինքնավարություն, շուտով այն ձեռք կբերենք նաև Սիրիայում, իսկ Սիրիային կհաջորդի Թուրքիան: Այդ երկրում ապրում է շուրջ 20 մլն.քուրդ: Թուրքական քրդերը չեն ցանկանում հարմարվել իրենց նվաստացուցիչ պայմաններին և մտադիր են ակտիվորեն պայքարել հանուն իրենց իրավունքների: Ահա թե ինչու են թուրքերն ընկել խուճապի մեջ, քանի որ քաջ գիտակցում են մոտեցող վտանգը և դրա համար էլ իրականացնում են քրդերի ցեղասպանություն, հետապնդում քուրդ ակտիվիստներին, գցելով նրանց բանտերն ու նրանց ենթարկելով անմարդկային տանջանքների՚,-տեղեկացրել է նա, հավելելով, որ ամեն օր, քուրդ-թուրքական բախումների արդյունքում, զոհվում է ավելի քան 10 թուրք զինվոր: Նրա խոսքերով, թուրքական բանտերում պահվում են ավելի քան 10 հազար քուրդ ակտիվիստներ, որոնց մեջ 1500-ը`կանայք են: ՙՆրանք ենթարկվում են սեռական ոտնձգությունների՚,-նշել է Հասանովը: