Քաղաքագետ. Ռուսական գազի վերջնական գինը որոշելիս Մոսկվան անպայման հաշվի կառնի Հայաստանի տնտեսության առանձնահատկությունները

• Հինգշաբթի, 9 օգոստոսի, 18:24

 Հայաստանի և Ռուսաստանի նախագահները վերջնական որոշում չեն կայացրել ռուսական գազի գնի առնչությամբ. նրանք ընդամենը համաձայնության են հանգել գնագոյացման սկզբունքների շուրջ: Հետևաբար`այս թեմայով որևէ շահարկումն անտեղի է: Այդ մասին այսօր մամլո ասուլիսի ժամանակ հայտարարել է ՙԵվրոպական ինտեգրացիա՚ հասարակական կազմակերպության նախագահ, քաղաքագետ Կարեն Բեքարյանը:

Նրա խոսքով, Սերժ Սարգսյանի և Վլադիմիր Պուտինի միջև բանակցությունների արդյունքները հանգում են այն բանին, որ գազի գինը Հայաստանի և տարածաշրջանի համար էապես տարբերվում է համաշխարհային գներից, և որ դա կապված է շատ գործոնների հետ, այդ թվում`Հայաստանի տնտեսության առանձնահատկությունների, որի համար գազի գինը շատ լուրջ նշանակություն ունի: ՙԱվելին, Մոսկվայում գոյություն ունի մեր երկրի տնտեսության հետ կապված իրավիճակի որոշակի ըմբռնում, և կարծում եմ, որ դա կանդրադառնա գազի գնի առնչությամբ վերջնական որոշում կայացնելու վրա՚,- նշել է նա:

Հիշեցնենք, որ նախօրեին Մոսկվայում ռուս գործընկերոջ հետ հանդիպումից հետո ՀՀ նախագահ Սերժ Սարգսյանը, մասնավորապեսմ, ասել է. ՙԽոսեցինք նաև Հայաստան ներկրվող բնական գազի գնի վերաբերյալ կարևոր թեմայի մասին: Կարծում եմ, որ փոխըմբռնման եկանք գնի ձևավորման սկզբունքների շուրջ. այն պետք է ելնի գազի իրական շուկայական գնից, բազմապատկած (կամ բաժանած՝ ինչպես կցանկանաք) Հայաստանին` նրա տնտեսության արդյունավետության պահպանմանը և տարածաշրջանում գործող սակագներին համադրելի բնական գազով ապահովելու անհրաժեշտությամբ՚:

Հայկական ԶԼՄ-ներում շրջանառվող լուրերի համաձայն, 2012 թ.հոկտեմբերի 1-ից ռուսական գազի գինը Հայաստանի համար կբարձրանա մինչև 1000 խմ դիմաց  $280, իսկ 2013 թ. հունվարի 1-ից`մինչև $320: Ներկայումս ռուսական գազի գինը Հայաստանի համար կազմում է 1000 խմ դիմաց $180: