Թերթ. Վանո Սիրադեղյանը հերքում է իր մահվան մասին տեղեկատվությունը և հայտարարում հայրենիք վերադառնալու մտադրության մասին

• Հինգշաբթի, 16 օգոստոսի, 18:08

 Միջազգային հետախուզման մեջ գտնվող Հայաստանի նախկին ներքին գործերի նախարար Վանո Սիրադեղյանը ՙՀրապարակ՚ թերթում հրապարակված իր բաց նամակով հերքում է իր մահվան մասին ԶԼՄ-ների տարածած տեղեկատվությունը և հայտարարում ՙմի գեղեցիկ օր՚ հայրենիք վերադառնալու մտադրության մասին:

Ընդ որում նամակում Սիրադեղյանն ընդգծում է, որ կվերադառնա Հայաստան, բայց հույս ունի՝ այնպես, որ չտեսնի ՙքաղաքական, սոցիալական, բարոյական այն ավերածությունները, որոնց ենթարկվել է մեր երկիրը՚ իր բացակայության ընթացքում:

Նա նաև հավաստիացնում է, որ  ձգտում է իրեն առավելագույնս մեկուսացնել Հայաստանի անցուդարձից: ՙՀատկապես՝ քաղաքական կոչվածից: Հատկապես՝ վերջին տարիներս: Այն աստիճան, որ այս տասներկուսուկես տարիներին թեկուզեւ 1 րոպե հայաստանյան հեռուստաալիք չեմ նայել, եթե չհաշվենք այն հազվադեպ ակնթարթները, երբ ալիք փոխելիս անզգուշաբար դիպչում եմ հայերենին ու այսահարվածի նման վրայով թռչում: Եթե անգամ գումարենք այդ ակնթարթները, հավատա, որ 12 տարվա մեջ 2 րոպե չի կազմի: Նեղանալու բան չի, նույն հիգիենիկ նկատառումներով չեմ նայում նաեւ ռուսական ալիքները: Երեւի դրա շնորհիվ է, որ այսքան ՙերկարակյաց՚ եմ, - գրում է նամակում Սիրադեղյանը:

Վանո Սիրադեղյանի նկատմամբ միջազգային հետախուզում էր հայտարարվել 2000 թվականին: Նրա նկատմամբ մեղադրանք է առաջադրվել ՀՀ ՔՕ 10 հոդվածներով: Սիրադեղյանը, մասնավորապես, մեղադրվում է այն բանի համար, որ 1992 թվականի ամռանը, ՆԳՆ ղեկավարի պաշտոնում գտնվելիս, կազմակերպել է զինված հանցավոր խումբ` առանձին քաղաքացիների և պաշտոնատար անձանց նկատմամբ հարձակումներ և սպանություններ իրականացնելու համար: