Arminfo: Նորություններ

Գալուստ Սահակյան. Ես քաղաքական գործիչ եմ, ոչ թե քարոզիչ

Thu, 23 Feb 2012 14:58:00 GMT

Ես քաղաքական գործիչ եմ, ոչ թե քարոզիչ, ես միշտ ազնվորեն ասում եմ այն, ինչ մտածում եմ`հաճախ նույնիսկ հակասության մեջ մտնելով իմ կուսակցության հետ: Իմ գործունեության նպատակն է`համակարգել քաղաքական մթնոլորտը երկրում, այլ ոչ թե նյութեր պատրաստել և խորհուրդներ տալ: Այսօր մամլո ասուլիսի ժամանակ այդպիսի կարծիք է հայտնել ՀՀԿ խորհրդարանական խմբակցության ղեկավար Գալուստ Սահակյանը:

Պատասխանելով լրագրողների հարցերին`պատգամավորը դրական գնահատական է տվել երկրի քաղաքական մթնոլորտին, ինչպես նաև նախընտրական քննարկումներին`հայտարարելով, որ քաղաքական դաշտը կայուն է և ակտիվ: ՙԸնտրախախտումների առանձին դեպքերը վկայում են օրենքի խախտումների առանձին դեպքերի, այլ ոչ թե զանգվածային կեղծիքների մասին՚,- նշել է հանրապետականը:

Խորհրդարանական ընտրություններից հետո նոր կոալիցիայի ստեղծումը, նրա կարծիքով, չպետք է ինքնանպատակ լինի. ընտրված բոլոր պատգամավորների առաջնահերթ խնդիրը պետք է նախընտրական խոստումների կատարումը լինի:

Նա նաև նշել է, որ մամուլի և ընդդիմության ակտիվությունն ընդհանուր առմամբ բարենպաստ ազդեցություն է ունենում քաղաքական իրադրության վրա: Պատասխանելով այն հարցին, թե չի կարծում արդյոք, որ ժողովուրդը և քաղաքական գործիչները քննարկում են կյանքի տարբեր կողմերը, իսկ նախընտրական բանավեճերն աննկատ են թողնում հասարակության հրատապ խնդիրները, պատգամավորը հայտարարել է, որ այդ ամենի պատճառն այն է, որ հանրապետության ողջ քաղաքականությունը կենտրոնացած է մայրաքաղաքում, իսկ երկրի զարգացումը պետք է սկսվի մարզերից:

Ադրբեջանցի փորձագետ. Ադրբեջանի ոչ իշխանությունները, ոչ հասարակությունը, ոչ ընդդիմությունը խաղաղարարության նկատմամբ հետաքրքրություն չեն դրսևորում

Thu, 23 Feb 2012 14:57:00 GMT

Ադրբեջանի ոչ իշխանությունները, ոչ հասարակությունը, ոչ ընդդիմությունը խաղաղարարության նկատմամբ հետաքրքրություն չեն դրսևորում: Բոլորը ցանկանում են վերադարձնել Ղարաբաղը, շատերը հանդես են գալիս հօգուտ խաղաղ կարգավորման, բայց ոչ ոք չի ցանկանում քննարկել, թե ինչպես կարելի է դրան հասնել: Ինչպես հաղորդում է ՙԹուրանը՚, այդ մասին Բաքվում կազմակերպված կլոր սեղանի ժամանակ հայտարարել է Հումանիտար հետազոտությունների միության ղեկավար Ավազ Գասանովը: Կլոր սեղանն անցկացվել է Մեծ Բրիտանիայի դեսպանության կողմից ֆինանսավորվող նախագծի շրջանակներում, որի ղեկավարը հենց Ա.Գասանովն է: ՙԴեմոկրատական մոնիտոր՚ հասարակական կազմակերպության ղեկավար Ֆուադ Գասանովն ր հերթին հայտարարել է, թե երկու հասարակություններում խաղաղարարության ներուժը ճնշվում է ժողովրդավարական ազատությունների սահմանափակումներով: ՙԱտլաս՚ հետազոտությունների կենտրոնի ղեկավար Էլխան Շախինօղլուն նշել է, թե հակամարտող կողմերի քաղաքացիական հասարակությունների միջև երկխոսությունն իրականացվում է միջազգային նախագծերի շնորհիվ, և դրանցից առավել ակտիվ են International Alert-ն ու Links-ը:

Բաքվում Մեծ Բրիտանիայի դեսպան Փիթեր Բեյթմենն իր հերթին կարևորել է քաղաքացիական հասարակության դերը հակամարտության կարգավորման գործում: Նա պաշտպանել է հասարակական կազմակերպությունների խաղաղարար ջանքերը ղարաբաղյան հակամարտության կարգավորման գործում և նշել ԶԼՄ-ներում ու ինտերնետում դրական փորձի լայն տարածման անհրաժեշտությունը: Նրա ասելով, Մեծ Բրիտանիայի դեսպանությունն իր կողմից պատրաստ է այսուհետև էլ աջակցել այդ ուղղությամբ ձեռնարկվող քայլերին:

Կանանց տոնի կապակցությամբ մարտի 8- 11-ը Հայաստանում կլինի ոչ աշխատանքային

Thu, 23 Feb 2012 14:15:00 GMT

Կառավարությունը Կանանց տոնի կապակցությամբ որոշել է 2012 թ. մարտի 9-ի աշխատանքային ուրբաթ օրը տեղափոխել մարտի 17-ը` շաբաթ օր: Արդյունքում մարտի 8- 11-ը հանրապետության քաղաքացիների համար հանգստյան օրեր կլինեն: Այդ մասին տեղեկացնում է ՀՀ կառավարության տեղեկատվության և հասարակայնության հետ կապերի վարչությունը:

March 8-11 announced days off in Armenia on occasion of International Women's Day

Thu, 23 Feb 2012 14:11:00 GMT

On occasion of the International Women's Day, Government of Armenia has announced March 8, Thursday, and the following Friday, days off in Armenia. In fact, the citizens will rest from March 8 to March 11. Instead, March 17 Saturday is announced a working day.

Head of the Government Staff David Sargsyan introduced the draft decision on the February 23 session of the government.

Թուրքիայի խորհրդարանի արտաքին կապերի հանձնաժողովը ճանաչել է առասպելական ՙԽոջալուի ցեղասպանությունը՚

Thu, 23 Feb 2012 14:09:00 GMT

Փետրվարի 22-ին Թուրքիայի խորհրդարանի արտաքին կապերի հանձնաժողովը որոշում է կայացրել փետրվարի 25-26-ի Խոջալուի իրադարձությունները ՙհայ զինվորականների կողմից ադրբեջանցիների նկատմամբ իրագործված ցեղասպանություն՚ ճանաչելու մասին:

Բանաձևի նախագիծը փետրվարի 9-ին հանձնաժողովին էր ներկայացրել Իգդիրից պատգամավոր Սինան Օղանը: Ընդունված փաստաթղթում այդ իրադարձությունները որակվել են հանցագործություն ընդդեմ մարդկայնության: Թուրք խորհրդարանականները նաև աջակցություն են հայտնել Ադրբեջանին այդ կոտորածի համար մեղավորներին պատժելու գործում:

Խոջալուի իրադարձությունները ՙհայերի կողմից ադրբեջանցիների նկատմամբ ցեղասպանություն՚ ճանաչելուց զատ որոշումը նախատեսում է փետրվարի 26-ը սահմանել ՙԽոջալուի ցեղասպանության՚ զոհերի հիշատակի օր և այդ ողբերգության զոհերի հուշարձան կանգնեցնել: Պատգամավորը նաև առաջարկում է Անկարայի Փարիզյան պողոտան վերանվանել Խոջալուի պողոտա:

ՀՀ դրամի փոխարժեքը ԱՄՆ դոլարի և եվրոյի նկատմամբ

Thu, 23 Feb 2012 14:05:00 GMT

Երևանի առևտրային բանկերից ԱրմԻնֆո գործակալությանը տրամադրված տվյալների համաձայն, տարադրամի փոխանակման բանկային կետերում այսօր ԱՄՆ դոլարի առքի առավելագույն գինը կազմել է 389 դրամ 1 դոլարի դիմաց, եվրոյի առքի առավելագույն գինը` 514 դրամ 1 եվրոյի դիմաց, իսկ ռուսական ռուբլու առքի գինը`12,9 դրամ 1 ռուբլու դիմաց: ԱՄՆ դոլարի վաճառքի նվազագույն գինը կազմել է 390 դրամ 1 դոլարի դիմաց, եվրոյի վաճառքի գինը կազմել է 518 դրամ 1 եվրոյի դիմաց, իսկ ռուսական ռուբլու վաճառքի գինը`13,1 դրամ 1 ռուբլու դիմաց:

Իրանի նկատմամբ պատժամիջոցները և Հայաստանի էներգետիկ շահը

Wed, 22 Feb 2012 21:58:00 GMT

Նկատի ունենալով ԵՄ կողմից Իրանի նկատմամբ պատժամիջոցների ուժի մեջ մտնելը`ավելի ակտուալ է դառնում հայ-իրանական համագործակցության վրա այդ պատժամիջոցների ներգործության հարցը: Խորամուխ չլինելով ինչպես երկու պետությունների միջև տնտեսական կապերի վերլուծության, այնպես էլ դրանց քաղաքական հիմքերի նկարագրության մեջ`անդրադառնանք ամենակարևոր հարցին, որը, կարծում ենք, համակարգաստեղծ նշանակություն ունի հայ-իրանական երկխոսության մեջ: Խոսքն, իհարկե, վերջիններիս կողմից իրականացվող էներգետիկ նախագծերի մասին է:

Ակնհայտ է, որ հայ-իրանական էներգետիկ համագործակցության ամենավառ դրսևորումներից մեկը Իրան-Հայաստան գազատարն է, որն աշխարհաքաղաքական կարևոր նշանակություն ունի ինչպես լոկալ, այնպես էլ տարածաշրջանային մակարդակով: Նախագիծը հաջողությամբ գործարկվեց, և, չնայած գազատարի գործունեության և երրորդ երկրներ դրա հետագա ելքի շուրջ տարաբնույթ վիճահարույց կարծիքներին` ակնհայտ է մեկ բան. գազատարն ապահովեց հանրապետության էներգետիկ անվտանգության ապահովման այլընտրանքային ճանապարհը, զգալիորեն դիվերսիֆիկացրեց վերջինիս էներգահամակարգը:

Իրան-Հայաստան գազատարն այսօր Իրանի և Հայաստանի կողմից իրականացվող միակ նախագիծը չէ: Առավել կարևորների թվում հարկ է նշել հայ-իրանական սահմանին նավթավերամշակման գործարանի կառուցումը, ինչպես նաև սահմանամերձ Արաքս գետի վրա հիդրոէլեկտրակայանների կառուցումը և Թավրիզ-Մեղրի նավթատարի անցկացումը:

Խոսելով հայ-իրանական համագործակցության վրա ԵՄ տնտեսական պատժամիջոցների ազդեցության, և մասնավորապես, այն հայտարարությունների մասին, թե հիշյալ իրադարձությունները կշրջանցեն Հայաստանը, նշենք. փակ վերարտադրության համակարգը, այսինքն`ավտարկիան, անհնար է արդի աշխարհում`անկախ համաշխարհային քաղաքական և տնտեսական գործընթացներին երկրի ինտեգրման աստիճանից: Իհարկե, տվյալ դեպքում մենք շատ կցանկանայինք դա: Սակայն ցանկությունների և հնարավորությունների վերաբերյալ թևավոր խոսքն ավելի քան երբևէ այժմեական է: Այսպիսով, ինչպե՞ս, ամենայն հավանականությամբ, կզարգանան մեր իսլամական հարևանի շուրջ իրադարձությունները, և ինչո՞վ է դա հղի Հայաստանի համար:

Իրանն արդեն այսօր հայտարարում է Պարսից ծոցը Օմանի ծոցին կապող Հորմուզի նեղուցի հնարավոր փակման մասին, ինչն, անշուշտ, կարող է լուրջ հարված հասցնել համաշխարհային նավթային շուկային: Նավթի գինը, որոշ կանխատեսումների համաձայն, կբարձրանա մինչև մեկ բարելի դիմաց $200, ինչն անմիջականորեն կանդրադառնա ինչպես մի շարք եվրոպական երկրների, այնպես էլ ԱՄՆ-ի տնտեսության վրա: Հետևաբար, էլ ավելի կմեծանա ԱՄՆ-ի կողմից Իրանին ռազմական հարված հասցնելու հավանականությունը: Քանի որ որևէ երկիր չի կարող ռազմական պայմաններում ֆինանսական խոշոր ներդրումներ պահանջող մասշտաբային նախագծեր իրականացնել, Իրանը ևս ստիպված կլինի որոշ ժամանակով մոռանալ իր էներգետիկ և տրանսպորտային շուկաների ընդլայնման մասին: Կարծիք կա, թե Իրանի ֆինանսական ներուժը լիովին բավարար է` նոր նախագծերի շրջանակներում լիարժեք համագործակցությունը շարունակելու նպատակով: Սակայն, հարկ է նշել, որ նույնիսկ Իրանի կողմից համագործակցությունը շարունակելու պատրաստակամության և քաղաքական կամքի առկայության դեպքում Իսլամական Հանրապետությունը հազիվ թե ցանկանա միանձնյա ֆինանսավորել միջպետական նախագծերը /նավթամուղ, երկաթուղի և այլն/: Այդպիսով, Հայաստանը ստիպված կլինի դիմել արտասահմանյան վարկերի`ավելացնելով իր արտաքին պարտքը: Բայց արդյո՞ք երկիրը պատրաստ է նման ռիսկի…

Միաժամանակ արդեն մեծանում է Արևմուտքին աջակցող ԱՊԼ մի շարք երկրների կողմից ճնշումը, հատկապես`Կատարի և Սաուդյան Արաբիայի կողմից: Վերջիններս արդեն հայտարարում են նավթի արդյունահանման`օրական 3-5 մլն բարելով հնարավոր ավելացման մասին`համարձակորեն հայտարարելով արևմտյան երկրներ սև ոսկու երաշխավորված մատակարարումների մասին: Ավելին, Սաուդյան Արաբիայի իշխանություններն ակտիվ երկխոսություն են վարում չինացի գործընկերների հետ իրանական նավթից Ժողովրդական Հանրապետության հրաժարվելու շուրջ: Եվ այդ բանակցությունների առաջին պտուղներն արդեն կան. Չինաստանում իրանական նավթի երկու խոշորագույն գնորդներից մեկը` Unipec ընկերությունը, օրերս հայտարարել է 2012 թվականին իրանական նավթի գնման կրճատման մասին: Ակնհայտ է, որ նույնիսկ որոշակի ծավալների պահպանման դեպքում պրագմատիկ Չինաստանը, այնուամենայնիվ, կփորձի օգտվել ստեղծված իրավիճակից`ստիպելով Իրանին նվազեցնել նավթի գինը: Եվ թեև Իրանը մտնում է աշխարհի ամենանավթաբեր և գազաբեր երկրների եռյակի մեջ, իսկ մարդկության կողմից էներգապաշարների սպառումը տարեկան ավելանում է 2%-ով, այնուամենայնիվ, հավանականություն կա, որ երկիրը ժամանակավորապես կհայտնվի էներգետիկ մեծ խաղից դուրս: Անշուշտ, Հայաստանը կշարունակի իրանական գազ գնել /իհարկե, ոչ մեծ քանակով, ինչպես այսօր/, սակայն միջկառավարական հանձնաժողովների կողմից արձանագրված մի շարք նախագծեր, ակնհայտորեն, թղթի վրա կմնան, առնվազն`առաջիկա տարիներին:

Երևանի քաղաքապետարանը նախատեսում է Մաշտոցի այգին վերածել ՙբետոնոգրադի՚

Wed, 22 Feb 2012 21:48:00 GMT

Բողոքի ակցիաները, որոնք շինարարական աշխատանքներն սկսելուց ի վեր տեղի են ունենում Մաշտոցի այգում, տհաճ անակնկալ հանդիսացան Երևանի քաղաքապետարանի համար: Որպեսզի ինչ-որ ձևով արդարացվի առևտրի տաղավարների տեղակայումը, քաղաքապետարանը որոշեց գնալ արդեն ստուգված ճանապարհով, կանաչ տարածքների ոչնչացումը մատուցելով որպես մայրաքաղաքի բարեկարգում:

Ինչպես հեռարձակում է քաղաքապետարանի պաշտոնական կայքը, նախատեսվում է այգում տեղակայել երկու լայն, սալապատ ճանապարհ, որոնք շրջանակված կլինեն հավերժ կանաչ ու դեկորատիվ մահիճներով: Բացի այդ, կվերանորոգվեն ոռոգման համակարգերը և կտեղադրվի նոր լուսավորություն: Աշխատանքները կսկսվեն արդեն գարնանը:

Այս ամենը, իհարկե, գեղեցիկ է հնչում, եթե չտեսնենք ապագա այգու տխրահռչակ պլանը: Ծառեր կան, բայց գտնվում են հեռու հորիզոնում: Ներկայումս աճող ծառերը խորհրդավոր ձևով անհետացան, իրենց տեղը զիջելով տնկիներին ու մի քանի մահիճներին: Հայտարարված սալապատ ճանապարհների վրա կտեղակայվեն նստարաններ, իսկ դրանց վրա ստիպված կլինենք նստել կիզիչ արևի ներքո:

Որպեսզի ՙապագայի պատկերից՚ դիտողի սիրտը ճախրի, քաղաքապետարանը որոշել է խորամանկել, քաղաքապետ Տարոն Մարգարյանի Facebook-ի էջում բարեկարգման պլանը տեղադրելով Մաշտոցի այգու լուսանկարի կողքին, որը, ի դեպ, նկարվել էր, ամենայն հավանականությամբ, վաղ գարնանը, կամ էլ ուշ աշնանը: Ծառերի վրա չկան տերևներ, իսկ թփերը դեռ նման են ճիպոտների: Իսկ ներքևում գրված է` ՙ2011 թվականի օգոստոս՚: Հմմ: Ահա թե ինչ է ստացվում: Անգամ Ֆոտոշոփի կարիքը չկա:

Առաջին անգամը չէ, որ քաղաքապետարանը փորձ է անում հասարակայնության հեքիաթներ պատմել տարածքների ՙբարեկարգման՚ վերաբերյալ: Բավական է հիշենք 2010 թվականը և Ուսանողական այգու հետ կապված սկանդալային պատմությունը, երբ սրճարանի համար անօրինական կերպով հատվեց մոտ 20 ծառ: Ըստ պաշտոնական տեղեկության, Վիկտոր Համբարձումյանի հուշարձանին մոտ հըմվող տարածքում նախատեսվում է տեղակայել նոր սալիկներ և բորդյուրներ, ինչպես նաև ՙթարմացնել՚ մերձակա թփերն ու կանաչները:

Անցավ որոշ ժամանակ: Չնայած բողոքի ակցիաներին և դատարանին դիմելուն, սրճարանը կառուցվեց: Համբարձումյանի հուշարձան տանող ճանապարհը, իրոք, սալապատված է: Թփերը, որոնք քաղաքապետարանը խոստացել էր ՙթարմացնել՚ են, աստիճանաբար մտնելով բետոնի մեջ, որպեսզի ամռանն այստեղ տեղադրվեն այդ նույն սրճարանի սեղանիկները: Այո, մոխրագույն, այլ ոչ թե կանաչ տեսք ունի բարեկարգումը` քաղաքապետարանի պատկերացումներով:

Որպեսզի Մաշտոցի այգու հետ կապված քաղաքապետարանի պատկերացումներն իրականություն չդառնան, կանաչ ակտիվիստները դեռ չեն հանձնվում և պատրաստ են շարունակել բողոքի ակցիաները: Փետրվարի 23-ին լրացավ այգին աղյուսե և բետոնե դրախտի վերածելու դեմ պայքարի ակցիայի 13-րդ օրը:

Առէկսիմբանկ Գազպրոմբանկի խումբն իր հաճախորդներին առաջարկում է առևտրի ֆինանսավորման փաստաթղթային գործառնությունների ժամանակակից գործիքներ

Wed, 22 Feb 2012 18:09:00 GMT

ՙԱռէկսիմբանկ Գազպրոմբանկի խումբ՚ ՓԲԸ-ն այսօր կազմակերպել էր ՙՓաստաթղթային գործառնությունների իրականացման գծով բանկի ժամանակակից ծառայությունները՚ թեմայով սեմինար, որի նպատակն էր բանկի հաճախորդներին ծանոթացնել միջազգային պրակտիկայում կիրառվող առևտրի ֆինանսավորման գործիքներին:

Բանկի գլխավոր տնօրենի տեղեկալ Ռուբեն Խաչատրյանի խոսքերով, սեմինարի նպատակն է պոտենցիալ հաճախորդներին ծանոթացնել կիրառվող տարբեր ակրեդիտիվներին և բանկային երաշխիքներին, ինչպես նաև դրանց տրամադրման մեխանիսմներին ու պայմաններին: Սեմինարի ընթացքում ներկայացվել են նաև առևտրի Միջազգային թերմինալներում (Incoterms) և երաշխիքների տրամադրման միջազգային միասնական կանոններում տեղի ունեցած փոփոխությունները:

Ինչպես տեղեկացրել է Ռ. Խաչատրյանը, բանկը մտադիր է 30-40% ավելացնել առևտրի ֆինանսավորման ծավալները, որը 2011 թվականին կազմել էր 5 մլն.դոլար, ինչի համար բանկն ունի ռուսական Գազպրոմբանկի և մյուս թղթակից-բանկերի կողմից տրամադրվող վարկային գծերի միջոցով գործարքների ֆոնդավորումը մեծացնելու նշանակալից հնարավորություններ: ՙՔանի որ առևտրի փաստաթղթային ֆինանսավորման սխեմաներում ներգրավվում են էժան ռեսուրսներ, ապա նման պրոդուկտի արժեքն էապես ցածր է ուղղակի կորպորատիվ վարկավորման արժեքից: Եթե այսօր սովորական վարկերի տոկոսադրույքերը կազմում են տարեկան 11-13%, ապա Գազպրոմբանկի կողմից առևտրի ֆինանսավորման միջին տոկոսադրույքերը կկազմեն տարեկան 4-5%: Այսօր դրանք վարկավորման ամենալավ պայմաներն են Հայաստանում՚,-նշել է մասնագետը, ընդգծելով, որ այդ դրույքը համարժեք է Հայաստանի երկրի ռիսկի ՙգնին՚:

Միևնույն ժամանակ, սեմինարում նշվել է, որ արտահանում և ներկրում իրականացնող բազմաթիվ գործարարներ հաճախ վատ են իրազեկված լինում բանկի պրոդուկտների և ծառայությունների մասին, որոնք կոչված են ոչ միայն զգալիորեն կրճատել ռիսկերը, այլ նաև էապես կրճատել ծախսերը, եթե խոսքը գնում է փոխառու միջոցներով իրականացվող գործառնությունների մասին: Դա հատկապես արդիական է Հայաստանի նման երկրի համար, որտեղ բեռների տեղափոխման հետ կապված ռիսկերը և ծախսերը բարձր են, որտեղ հաճախ մատակարարումները ձգձգվում են 2-3 ամսով: Հատկապես օպտիմալ է լիզինգային և ֆակտորինգային գործառնություններն իրականացնել ոչ թե սովորական վարկերով, այլ փաստաթղթային գործառնությունների սխեմաներով` ակրեդիտիվների զանազան տեսակներով:

ԱրմԻնֆո գործակալության թղթակցի հետ զրույցում Ռուբեն Խաչատրյանը տեղեկացրել է, որ ներկայումս բանկը բանակցում է Եվրասիական Զարգացման Բանկի հետ, առևտրի ֆինանսավորման համար 10 մլն.դոլարի վարկային գիծ ստանալու նպատակով: Նախատեսվում է նաև էներգախնայող նախագծերի վարկավորման և ՓՄՁ զարգացման նպատակներով լրացուցիչ ռեսուրսների ստացում: Նշենք, որ բանկը մասնակցում է մի շարք միջազգային ծրագրերի, այդ թվում`Համաշխարհային Բանկի և գերմանական KfW բանկի ծրագրերին, ներգրավված լինելով նաև առևտրի ֆինանսավորման հատվածում:

Ըստ ԱրմԻնֆո գործակալության կողմից կազմված`Հայաստանի առևտրային բանկերի Ռենկինգի, 2011 թվականի արդյունքներով, ՙԱռէկսիմբանկ Գազպրոմբանկի խումբ՚ ՓԲԸ ընդհանուր կպիտալը կազմել է 15.7 մլրդ.դրամ, գրանցելով տարեկան 6% աճ, ակտիվները` 95.9 մլրդ.դրամ, աճելով 42.2%, վարկային ներդրումները` 75.9 մլրդ.դրամ, աճելով 85.5%: Վարկային պորտֆելի կազմում տնտեսության վարկավորման ծավալը կազմել է 82%, այդ թվում` արդյունաբերության բաժինը կազմել է 40%, իսկ առևտրի ոլորտի բաժինը` 20%: 2011 թվականի արդյունքներով, բանկի զուտ շահույթը կազմել է 1.0 մլրդ.դրամ: Նշենք, որ Բանկի բաժնետոմսերի 100% փաթեթը պատկանում է ռուսական խոշորագույն Գազպրոմբանկին:

Փորձագետ. Շոտլանդիայի անկախության կայացման գործընթացը կարևոր է ոչ միայն Ղարաբաղյան հարցի կարգավորման, այլ նաև ողջ աշխարհի համար

Wed, 22 Feb 2012 17:59:00 GMT

Շոտլանդիայի անկախության կայացման գործընթացը կարևոր է ոչ միայն Ղարաբաղյան հարցի կարգավորման, այլ նաև ողջ աշխարհի համար, այսօր մամլո ասուլիսի ժամանակ հայտարարել է վերջերս Շոտլանդիայից վերադարձած «Եվրոպական ինտեգրացիաե ՀԿ-ի նախագահ Կարեն Բեքարյանը:

ՙՇոտլանդիայի անկախության ձեռքբերման նպատակահարմարության շուրջ բանավեճերին մասնակցում է 5 կուսակցություն, որից երկուսը համաձայն է Շոտլանդիայի անկախությանը, իսկ երեքը`դեմ: Ըստ որում, սոցհարցումները ցույց են տվել, որ տվյալ պահին անկախության կողմնակիցների թիվը շատ ավելի քիչ է: Այդ հարցի առնչությամբ հանրաքվեն պետք է տեղի ունենա 2014 թվականին:

Համեմատելով Շոտլանդիայի և Լեռնային Ղարաբաղի անկախության հարցերը`Բեքարյանը նշել է, որ Հայաստանի, Ադրբեջանի և Ղարաբաղի միջև քաղաքակիրթ բանակցություններ տեղի կունենան միայն այն ժամանակ, երբ կողմերի միջև ստորագրվի Ադրբեջանի կողմից ուժի և այն գործադրելու սպառնալիքների չկիրառման վերաբերյալ պայմանագիր: ՙՄեծ Բրիտանիան հայտարարել է, որ անկախ 2014 թ. հանրաքվեի արդյունքներից`Շոտլանդիան կմնա իր համար առաջին հարազատ պետությունը: Ուշագրավ է, որ դրանից հետո Ադրբեջանը, որն ավելի վաղ պահանջում էր Մինսկի խմբում իրեն չգոհացնող Ֆրանսիան փոխարինել Մեծ Բրիտանիայով, անմիջապես փոխել է համակրանքները`հօգուտ Գերմանիայի՚,- ամփոփել է վերլուծաբանը:

Մոսկվայում կընթանա ադրբեջանցի և հայ մտավորականության ներկայացուցիչների աշխատանքային հանդիպում

Wed, 22 Feb 2012 17:58:00 GMT

Այսօր տեղի կունենա ադրբեջանցի և հայ մտավորականության ներկայացուցիչների աշխատանքային հանդիպում, որն առաջինն է քառամյա ընդմիջումից հետո: Այդ մասին ՙՌոսիյսկայա գազետայում՚ հրապարակված իր ՙԵրկրորդ փորձ՚ հոդվածում հայտարարել է ՌԴ նախագահի միջազգային մշակութային համագործակցության գծով հատուկ ներկայացուցիչ Միխայիլ Շվիդկոյը:

Նրա կարծիքով, քառամյա դադարը պատահական չէր կարող լինել: ՙՉնայած այն հանգամանքին, որ դիվանագիտական շփումներում տևական դադար չի եղել, երկար ժամանակ տարբեր պատճառներով չէր հաջողվում շարունակել այն հումանիտար երկխոսությունը, որը նախաձեռնել էին Ադրբեջանի և Հայաստանի մշակույթի նախկին նախարարներ, հետո Մոսկվայում իրենց երկրների դեսպաններ Պոլադ Բյուլ-Բյուլօղլուն և Արմեն Սմբատյանը:

Շվիդկոյը նաև նշում է, թե քիչ չեն այնպիսիք, ովքեր տեսնում են հիմնախնդրի միայն մեկ լուծում` զինված հակամարտությունը շարունակելու ճանապարհով: ՙՍակայն նոր պատերազմի ցանկացած պատրաստության դեպքում հարկավոր է հասկանալ, որ այն կհանգեցնի հսկայական զոհերի մեկ և մյուս կողմում: Պատերազմներում, ընդհանրապես, հաղթողներ չեն լինում, քանի որ հաղթանակները նվաճվում են մարդկային կորուստների անհատույց գնով: Եվ ինչպես ասում էր ֆրանսիացի կին գրողը, կարծեմ, Սիմոնա դե Բովուարը, եթե երկար ես ապրում, ապա համոզվում ես, որ հաղթողներն էլ են հայտնվում պարտվողի վիճակում: Հենց այդ պատճառով այսօր փոխզիջումը ոչ թե թուլության, այլ ուժի նշան է՚, - ասել է ՌԴ նախագահի միջազգային մշակութային համագործակցության գծով հատուկ ներկայացուցիչը:

Փորձագետ. Խոջալուի հարցը չի կարգավորվում հայկական կուսակցությունների կողմից վերջինիս քաղաքականացվածության հետևանքով

Wed, 22 Feb 2012 17:56:00 GMT

Խոջալուի հարցը չի կարգավորվում հայկական կուսակցությունների կողմից վերջինիս քաղաքականացվածության և այդ խնդրի արդար կարգավորման առնչությամբ միասնական մոտեցման բացակայության հետևանքով: Այդպիսի կարծիք է հայտնել ԵՊՀ պրոֆեսոր, Քաղաքական ուսումնասիրությունների ակադեմիայի տնօրեն Ալեքսանդր Մանասյանը:

Նրա խոսքով, Ադրբեջանի քարոզչամեքենան ձգտում է աշխարհով մեկ ոչնչացնել հայ ժողովրդի հերոսական կերպարը: Մինչդեռ ՙԽոջալուի իրադարձություններին՚ նվիրված հայ գրականությունը գրված է միայն հայերի համար, և դրա ընթերցողները միայն հայերն են, Բաքուն, փորձագետի կարծիքով, լրջորեն զբաղվում է քարոզչությամբ` համացանցում տարածելով իրականությանը չհամապատասխանող տեղեկություններ: Մանասյանի կարծիքով, Հայաստանը պետք է խոչընդոտի դրան և ստեղծի ավելի հզոր քարոզչամեքենա`արմատապես ազդելու միջազգային կարծիքի վրա:

ԱրմԻնֆո-ի թղթակցի այն հարցին, թե արդյոք բավականաչափ գիտական և լրագրողական ներուժ կա այդ նպատակի իրականացման համար, պրոֆեսորը ցավով նշել է. ՙԱռայժմ չենք հասել այդ մակարդակին, սակայն դա ժամանակի հարց է: Այս պահին հրատարակվել է այդ թեմայով մի քանի գիրք: ՙՀայերի կոտորածները Բաքվի և Ելիզավետպոլի նահանգներում 1918-1920թթ.՚ գիրքը պարունակում է Հայաստանի ճշմարտացիությունն ապացուցող կոնկրետ փաստաթղթեր՚: Ակնհայտ է դառնում, որ արդյունավետ քարոզչության մասին, հաշվի առնելով, որ վերոհիշյալ գիրքը լույս տեսել 2003 թվականին` մի քանի օրինակով և միայն հայերեն լեզվով, խոսք անգամ չի կարող լինել:

Սոցիոլոգ.Հայաստանի սոցիալ-քաղաքական իրավիճակի կայունացման գործում առավել նշանակալից է հանրապետականների և ՙԲարգավաճ Հայաստանի՚ ներդրումը

Wed, 22 Feb 2012 17:54:00 GMT

Հայաստանի սոցիալ-քաղաքական իրավիճակի կայունացման գործում առավել նշանակալից է հանրապետականների և ՙԲարգավաճ Հայաստանի՚ ներդրումը, և կարելի է եզրակացնել, որ ներկայիս քաղաքական զարգացումները պայմանավորում են հենց այդ քաղաքական ուժերը: Այսօր մամլո ասուլիսի ժամանակ այդպիսի կարծիք է հայտնել ՙՍոցիոմետր՚ սոցիոլոգիական կենտրոնի տնօրեն Ահարոն Ադիբեկյանը:
Ներկայացնելով հունվարին Հայաստանի բոլոր մարզերում 1650 չափահաս քաղաքացիների շրջանում անցկացված հարցման արդյունքները`Ադիբեկյանը նշել է, որ հարցման մասնակիցների 60%-ը հետևում է քաղաքական իրադարձություններին, 15%-ը դեռ չի հետևում, իսկ 25% -ն ընդհանրապես դրանցով չի հետաքրքրվում: Նա նաև նշել է, որ Հայաստանի կուսակցությունների վերաբերյալ ընտրողների իրազեկվածությունը բավականին համեստ է: Քաղաքական ուժերին, որոնք մասնակցելու են մայիսին կայանալիք ընտրություններին, ծանոթ է հարցման մասնակիցների 31%-ը, դրանց առաջնորդներին`32,6%-ը, կուսակցությունների նպատակներին` 14,7% -ը:
Որպես ընտրազանգվածի նախապատվությունների վրա ազդող ծանրակշիռ գործոն`սոցիոլոգը նշել է այս կամ այն քաղաքական ուժի ներդրումը սոցիալ-տնտեսական իրավիճակի կայունացման գործում: Նրա խոսքով, մեծ ներդրում ունեն Հայաստանի հանրապետական կուսակցությունը` 16,6% , ԲՀԿ-ն` 11,1%,ՀՅԴ-ն`1,7%, ՙՕրինաց երկիրը՚` 0,8%, ՙԺառանգությունը՚` 1,7%, Հայ ազգային կոնգրեսը`0,4%:
Նա նաև հաղորդել է, որ հարցման մասնակիցների 40%-ը վստահ է, որ մայիսին կայանալիք ընտրություններն ուղեկցվելու են լուրջ խախտումներով, 36,6%-ը վստահ է, որ լինելու են թեթև խախտումներ, 17% -ը վստահ է, որ կլինեն համեմատաբար արդար ընտրություններ: Նա նաև նշել է, որ առաջիկա ընտրություններին ՀՀԿ վարկանիշը կկազմի 16%, ԲՀԿ-ն`14,7, ՀԱԿ-ը`3,5, ՀՅԴ-ն` 2,5, ՕԵԿ-ը` 2,15 և ՙԺառանգությունը՚` 2,1%: Նրա խոսքով, ընտրությունների մասնակիցների առավելագույն քանակը կտատանվի 58,5%-ից մինչև 63,2%:
Ադիբեկյանի կարծիքով, ընտրությունների ելքը կորոշվի ՀՀԿ-ի և ԲՀԿ-ի մրցակցության արդյունքներով: Նա նշել է, որ կրկնվում է 2007 թ. սցենարը, երբ նախընտրական արշավում ԲՀԿ-ն ձեռք բերեց շատ վարկանշային միավոր, բայց չկարողացավ պահպանել իր առավելությունն ընտրություններում:

Օբամայի վարչակազմը քննադատության է ենթարկվում ոչ ժողովրդավարական վարչակազմերի հետ հարաբերությունների համար

Wed, 22 Feb 2012 13:23:00 GMT

ՙՀանուն միջազգային խաղաղության՚ Քարնեգիի համաշխարհային հիմնադրամը քննադատության է ենթարկել Բարաք Օբամայի վարչակազմին Կենտրոնական Ասիայի և Կովկասի ոչ ժողովրդավարական կառավարությունների հետ հարաբերությունների համար:

Հիմնադրամի փոխնախագահ Թոմաս Քարոզերսն իր ՙԺողովրդավարության քաղաքականությունն Օբամայի օրոք. աշխուժացում թե՞ նահանջ՚ հոդվածում նշել է, որ Ասիայում և Կովկասում Օբամայի վարչակազմը ՙբարեկամական հարաբերություններ է պահպանում Ղազախստանի, Ուզբեկստանի, Ադրբեջանի, Հայաստանի և Ղրղըզստանի ոչ ժողովրդավար կառավարությունների հետ` հանուն տարբեր արտոնույթունների, մասնավորապես, Աֆղանստանի պատերազմի, նավթի ու գազի մատչելության առնչությամբ նյութատեխնիկական համագործակցության՚:

ՙԱրդյո՞ք դա նշանակում է, որ Օբամայի արտաքին քաղաքականությունում ժողովրդավարությունն իրականում սոսկ երկրորդական պահ է, և շատ տեղերում դրա նշանակությունը չափազանցվում է հանուն այլ շահերի: Դա կլիներ նահանջ ժողովրդավարության բնագավառում ԱՄՆ վերջին տարիների քաղաքականությունից: Այդ հարցերի պատասխանը պահանջում է հռետորաբանության և իրականության շատ ուշադիր ուսումնասիրում, որոնցով ԱՄՆ մշտապես շրջապատում է ժողովրդավարության առաջընթացը՚, - նշել է Քարոզերսը: Մինչդեռ, նրա ասելով, վարչակազմը նվազեցնում է ժողովրդավարության և մարդու իրավունքների կարևորությունը մի շարք ոչ ժողովրդավարական երկրներում` հանուն այլ շահերի:

Մաշտոցի այգու շուրջ ստեղծված իրավիճակը Ոստիկանությանն ստիպում է քննարկումներ անցկացնել հասարակական կազմակերպությունների հետ

Wed, 22 Feb 2012 13:19:00 GMT

Հայաստանի ոստիկանությունը հայտարարություն է տարածել Մաշտոցի պողոտային հարող այգում շինարարական աշխատանքների առնչությամբ բնապահպանական և այլ հասարակական կազմակերպությունների կողմից կազմակերպված գործողությունների և հայտարարությունների առնչությամբ:

Ինչպես նշվում է Ոստիկանության մամուլի ծառայությունից ԱրմԻնֆո գործակալությանը տրամադրված հայտարարության տեքստում, ՀՀ ոստիկանությունը լիազորված չէ կասկածի տակ դնել քաղաքապետի կողմից արձակված և չվիճարկված վարչական ակտերի, այդ թվում` շինարարակական թույլտվության իրավաչափությունը: Դա որոշելու լիազորությունը պատկանում է բացառապես վարչական դատարանին: ՙՀետևաբար ոստիկանությունը պարտավոր էր թույլ չտալ միջամտություն հիշատակված շինարարական աշխատանքներին, ապահովելով Մաշտոցի պողոտային հարող այգում հասարակական կարգի պատշաճ պահպանությունը, այդ թվում նաև այդ աշխատանքները խոչընդոտող անձանց և շինարարների անվտանգությունը: Ուստի հասարակական կարգի պահպանմանն ուղղված ոստիկանության պահանջները միանշանակ բխել են օրենքից: ՀՀ ոստիկանությունն արդեն իսկ փաստել է, որ թույլատրված շինարարական աշխատանքների խոչընդոտումը չի պաշտպանվում հավաքների ազատությամբ, քանի որ հավաքների խաղաղ իրականացումը բացառում է ներկայացված պահանջների հարկադրաբար կենսագործումը հավաքի մասնակիցների կողմից: Նման գործողությունները կարող են որակվել որպես ինքնիրավչություն և առաջացնել վարչական պատասխանատվություն: Հասարակական կարգի և հասարակական անվտանգության խախտումների առնչությամբ ոստիկանության ծառայողի օրինական պահանջները չկատարելը նույնպես հանգեցնում է վարչական պատասխանատվության: ՀՀ ոստիկանությունն իրավասու էր կիրառելու վարչական հարկադրանքի միջոցներ, սակայն, ոստիկանության կանխարգելիչ լիազորությունների շրջանակներում` ելնելով լարվածության թուլացման սկզբունքից, ձեռնպահ է մնացել այդ միջոցների կիրառումից: Միևնույն ժամանակ, ոստիկանությունն առավել վտանգավոր է համարում հավաքի մասնակիցների այն կոչերը, որոնք ուղղված են նրանց կողմից ոստիկանության պահանջները չկատարելուն: Ոստիկանությունը գտնում է, որ դրանց միակ նպատակը իրավիճակի արհեստական սրումն է՚, - ասվում է հայտարարության մեջ:

Կարևորելով հանրության տարբեր տեսակետները և հանրային իրազեկվածության բարձրացումը` ՀՀ ոստիկանությունն իր պատրաստակամությունն է հայտնում բոլոր շահագրգիռ հասարակական կազմակերպությունների ներկայացուցիչների հետ անցկացնելու կլոր սեղանի շուրջ քննարկումներ` ոստիկանության գործողությունների իրավական հիմքերին վերաբերող հիմնահարցերի շուրջ: Հայտարարության մեջ նշվում է, որ քննարկումները տեղի կունենան փետրվարի 28-ին, ժամը 12.00-ին, ՀՀ ոստիկանության շենքում (հասցեն Նալբանդյան 130): Շահագրգիռ կազմակերպություններին խնդրվում է մասնակցության հայտերը (ներկայացուցչի տվյալները) ներկայացնել ՀՀ ոստիկանության հասարակայնության հետ կապի և լրատվության վարչություն, մինչև փետրվարի 27-ի ժամը 16.00-ն (հասցեն` Նալբանդյան 130, ոստիկանության Մշակույթի կենտրոն, 2-րդ հարկ, հեռ.՝ 54-73-14, էլեկտրոնային փոստի հասցեներ` press@police.am, vostikanutyun@yahoo.com):