Մշակույթի նախարարությունը հերքում է այն տեղեկատվությունը, թե Փակ շուկան ևս 4 հարկով կբարձրանա

• Հինգշաբթի, 31 մայիսի, 18:36

Մշակույթի նախարարությունը հերքում է այն տեղեկատվությունը, թե Փակ շուկան ևս 4 հարկով կբարձրանա, ինչի մասին հաղորդել էր ՙՀայկական ժամանակը՚:

ՙՇինարարական ընկերությունը Մշակույթի նախարարությանը չորս հարկ կառուցելու նախագիծ չի ներկայացրել՚, - ԱրմԻնֆոյի թղթակցի հետ զրույցում հաղորդել է նախարարության հասարակայնության հետ կապերի բաժնի վարիչ Գայանե Դուրգարյանը: Նրա ասելով, հիմնանորոգումից հետո Փակ շուկայի ամբողջականությունը կպահպանվի: Դուրգարյանը միևնույն ժամանակ տեղեկացրել է, որ վերանորոգման ընթացքում կիրագործվեն ՙնոր լուծումներ՚: Մասնավորապես, շուկան կունենա մուտք սահմանափակ ֆիզիկական հնարավորություններ ունեցող անձանց համար:

Ինչ վերաբերում է Փակ շուկայի դռան անհետացմանը, որն, ըստ էության, նրա այցեքարտ է և գլխավոր զարդը, ապա այդ խորհրդավոր պատմության վրա լույս կսփռվի արդեն այսօր: Ինչպես հաղորդել է Դուրգարյանը, այսօր Պատմամշակութային հուշարձանների պահպանման գործակալության Երևանի տարածքային բաժնի պետ Կարո Այվազյանը կայցելի 3-րդ մասի այն վայրը, ուր փախդրվել է ապամոնտաժված դուռը: Հիշեցնենք, որ այն կրկնում է Մակարավանքի (10-13-րդ դդ.) խորանի հարթաքանդակները:

Հոդվածներ նույն թեմայով