Իսրայելի ֆինանսների նախարար. 2-3 տարի անց Իրանը կարող է միջմայրացամաքային հրթիռներ ստեղծել

• Հինգշաբթի, 23 փետրվարի, 04:07

Երևան: 23.02.12: ԱրմԻնֆո: Իրանն աշխատում է միջմայրացամաքային բալիստիկ հրթիռների ստեղծման ուղղությամբ, որոնք կարող են ստեղծվել արդեն 2-3 տարի հետո: Այդպիսի կարծիք է հայտնել Իսրայելի ֆինանսների նախարար Յուվալ Շտայնիցը ամերիկյան NBC հեռուստաալիքով հեռարձակված հարցազրույցում: ՙԱյդ հրթիռները կարող են հարվածել ԱՄՆ արևելյան ափի օբյեկտներին՚, - հայտարարել է Յու.Շտայնիցը:

Փորձագետների տեղեկությունների համաձայն, այս պահին Իրանն ունի շուրջ 2,4 հազար կմ թռիչքային հեռավորության հրթիռներ: Արևմտյան երկրները լրջորեն մտահոգված են Մերձավոր արևելքում միջուկային անվտանգության հարցով: Ճգնաժամի հերթական սրումն սկսվեց 2011 թվականի նոյեմբերի վերջին Ատոմային էներգիայի միջազգային գործակալության զեկույցի հրապարակումից հետո, որի համաձայն, մինչև 2003 թվականն Իրանը միջուկային զենքի զտեղծման աշխատանքներ է իրականացրել, և նման գործունեությունը կարող էր շարունակվել առ այսօր: ԱՄՆ, Իսրայելը և արևմտյան մի շարք երկրներ Իրանին կասկածում են միջուկային զենքի ստեղծման փորձերի համար: Իրանի կառավարությունը հայտարարում է, որ իր միջուկային ծրագիրը խաղաղ բնույթ է կրում: