Թեհրանում ավարտվել են ԱԷՄԳ և Իրանի միջև նախնական բանակցությունները

• Չորեքշաբթի, 23 մայիսի, 00:35

Երևան: 22.05.12: ԱրմԻնֆո: Թեհրանում ավարտվել են Ատոմային էներգիայի միջազգային գործակալության (ԱԷՄԳ) ղեկավար Յուկիա Ամանոյի և Իրանի ղեկավարության միջև  բանակցությունները ՙ5+1՚ հանդիպման նախաշեմին: Ինչպես հաղորդում է BBC-ն, Ատոմային էներգիայի միջազգային գործակալությունը բանակցությունների պաշտոնական արդյունքների մասին չի հաղորդել: Իրանական ԶԼՄ-ների հաղորդումների համաձայն, հանդիպումն անցել է բարեկամական մթնոլորտում: Ինչպես ավելի վաղ հայտարարել էր ԱԷՄԳ ղեկավարը, իր այցը Թեհրան նվիրված էր ԱԷՄԳ տեսուչների կողմից Իրանի միջուկային օբյեկտների ստուգման նկատմամբ կառուցողական մոտեցում ձևավորելու շուրջ համաձայնության ձեռք բերմանը:

Հիշեցնենք, որ միջնորդ պետությունների ՙվեցյակի՚ (ԱՄՆ, Ռուսաստան, Ֆրանսիա, Չինաստան,  Մեծ Բրիտանիա և Գերմանիա) հետ Իրանի հանդիպումը կկայանա մայիսի 23-ին Բաղդադում: Կողմերի միջև բանակցությունների առաջին փուլը կայացել է ապրիլի 14-ին Ստամբուլում` 15 ամսվա ընդմիջումից հետո, երկրորդը` մայիսի 13-14-ին: Ավելի վաղ Իրանը և ՙվեցյակը՚ փորձել են պայմանավորվել 2010 թվականի դեկտեմբերին Ժնևում և 2011 թվականի հունվարին Ստամբուլում: Միջազգային հանրությունը մտավախություն ունի, որ Իրանը կարող է միջուկային զենք մշակել խաղաղ միջուկային ծրագրի քողի ներքո: Թեհրանը հերքում է իրեն հասցեագրված մեղադրանքները, սակայն միջազգային դիտորդներին թույլ չի տալիս մուտք գործել մի քանի հիմնական միջուկային օբյեկտներ: