ԱԷՄԳ ղեկավարը լավատեսորեն է տրամադրված իրանական կողմի հետ բանակցությունների նախաշեմին

• Երկուշաբթի, 21 մայիսի, 18:17

Երևան: 21.05.12: ԱրմԻնֆո: Ատոմային էներգիայի միջազգային գործակալության (ԱԷՄԳ) ղեկավար Յուկիա Ամանոն լավատեսորեն է տրամադրված Իրանի ազգային անվտանգության բարձրագույն խորհրդի քարտուղար Սաիդ Ջալիլիի հետ բանակցությունների նախաշեմին, որոնք պետք է կայանան մայիսի 21-ին: Ինչպես հաղորդում է Reuters-ը, ԱԷՄԳ ղեկավարն ընդսմին հայտարարել է, որ հանդիպման հաջող ելք չի կանխորոշվում: ՙԻմ այցը Թեհրան նվիրված է կառուցողական մոտեցում (ԱԷՄԳ տեսուչների կողմից Իրանի միջուկային օբյեկտների ստուգման նկատմամբ) ձևավորելու շուրջ համաձայնության ձեռք բերմանը՚, - ասել է Յու.Ամանոն:

Հիշեցնենք, որ միջնորդ պետությունների ՙվեցյակի՚ (ԱՄՆ, Ռուսաստան, Ֆրանսիա, Չինաստան,  Մեծ Բրիտանիա և Գերմանիա) հետ Իրանի հանդիպումը կկայանա մայիսի 23-ին Բաղդադում: Կողմերի միջև բանակցությունների առաջին փուլը կայացել է ապրիլի 14-ին Ստամբուլում` 15 ամսվա ընդմիջումից հետո, երկրորդը` մայիսի 13-14-ին: Ավելի վաղ Իրանը և ՙվեցյակը՚ փորձել են պայմանավորվել 2010 թվականի դեկտեմբերին Ժնևում և 2011 թվականի հունվարին Ստամբուլում: Միջազգային հանրությունը մտավախություն ունի, որ Իրանը կարող է միջուկային զենք մշակել խաղաղ միջուկային ծրագրի քողի ներքո: Թեհրանը հերքում է իրեն հասցեագրված մեղադրանքները, սակայն միջազգային դիտորդներին թույլ չի տալիս մուտք գործել մի քանի հիմնական միջուկային օբյեկտներ: