Բաքվում ձերբակալվել են իրանական հեռուստատեսության թղթակիցն ու վարորդը

• Երկուշաբթի, 20 փետրվարի, 04:06

Երևան: 20.02.12: ԱրմԻնֆո: Նախօրեին Բաքվում ձերբակալվել է իրանական հեռուստատեսության թղթակից, Ադրբեջանի քաղաքացի Անար Բայրամլին: Ինչպես ՙԹուրան՚ գործակալությանը հաղորդել է ձերբակալվածի եղբայր Էլդար Բայրամլին, վերջին 20 օրերին լրագրողին բազմիցս կանչել են ոստիկանական բաժանմունք և հարցուփորձ արել նրա քաղաքական նախասիրությունների մասին: Լրագրողին ձերբակալել են ապօրինի թմրանյութեր պահելու համար. նրա մոտ հայտնաբերել են 4 գ հերոյին: Մինչդեռ լրագրողնի եղբայրը համոզված է, որ թմրանյութը ոստիկաններ են դրել Անարի մոտ: Աղբյուրի համաձայն, 31-ամյա Անար Բայրամլին 5 տարի աշխատում էր իրանական հեռուստատեսության համար, հեռուստահաղորդումներ էր պատրաստում տարբեր հեռուստառադիոհեռարձակման կառույցների համար, ներառյալ ՙՍահար՚ արբանյակային հեռուստաալիքը, որը հայտնի է Ադրբեջանի իշխանություններին ուղղված քննադատությամբ: Նախօրեին Սումգայիթում ձերբակալվել է նաև Ադրբեջանում իրանական հեռուստատեսության ներկայացուցչության վարորդ Ռամիլ Դադաշևը: Ձերբակալության պատճառների մասին ոչինչ չի հաղորդվում:

Մեկնաբանելով վերը նշված ձերբակալությունները` Բաքվում Իրանի դեսպանության մամուլի քարտուղար Աբաս Իսքենդերին հայտարարել է, որ ԻԻՀ դեսպանությունը չի ընդունում իրանական հեռուստատեսության ներկայացուցչության աշխատակիցներին վերագրվող մեղադրանքները, քանի որ նրանք ազնիվ ու պարկեշտ մարդիկ են և իրենց գործի պրոֆեսիոնալ: ԻԻՀ դեսպանության ներկայացուցիչը կարծում է, որ իրանական հեռուստատեսության ներկայացուցչության աշխատակիցների ձերբակալությունն իրականացվել է երկկողմ հարաբերություններին վնասելու նպատակով: