Քաղաքական գործիչ. 5-րդ գումարման խորհրդարանը սուր զենք կլինի ՀՀԿ ձեռքում

• Ուրբաթ, 1 հունիսի, 01:01

 5-րդ գումարման խորհրդարանը որակապես չի տարբերվի նախորդից և առաջվա պես սուր զենք կլինի Հայաստանի հանրապետական կուսակցության ձեռքում: Այսօր մամլո ասուլիսի ժամանակ այդպիսի կարծիք է հայտնել ՙԱզգային ժողովրդավարների դաշինք՚ կուսակցության նախագահ Արշակ Սադոյանը:

ՙԻշխանություններն օգտագործում են վերարտադրվելու համար բոլոր միջոցները, և դրանից մեկը կդառնա ԱԺ-ն, որը կընդունի իշխանությունների ապօրինի գործողություններն արդարացնող օրենքներ: Նման գործողություններից մեկը խորհրդարանական ընտրություններն էին, որունց ժամանակ Հայաստանի իշխանությունները ոսկերչական աշխատանք կատարեցին և կարողացան մեծամասնություն կազմել 5-րդ գումարման խորհրդարանում՚,- հայտարարել է Սադոյանը:

Սադոյանի խոսքով, Հայաստանի հանրապետական կուսակցության հաղթանակն առավել քան կանխատեսելի էր`հաշվի առնելով նրա ունեցած վարչական ռեսուրսը, սակայն անակնկալը կոալիցիա կազմելուց ՙԲարգավաճ Հայաստանի՚ հրաժարվելն էր: Նա նաև նշել է, որ ԲՀԿ-ին չի տեսնում ընդդիմադիր դաշտում, քանի որ հնարավոր չի համարում ընդդիմադիր օլիգարխի գոյությունը Հայաստանի քաղաքական դաշտում: Ըստ որում, Սադոյանը նշել է, որ ՙԲարգավաճ Հայաստանի՚ կողմնորոշումը կփոխվի միայն Գագիկ Ծառուկյանի ֆինանսական պահանջների բավարարման դեպքում, որոնք միանշանակ կբավարարվեն`հաշվի առնելով, որ մինչև նախագահական ընտրությունները քիչ ժամանակ է մնացել, և Սերժ Սարգսյանին հարկավոր է ԲՀԿ աջակցությունը: