ՙՀայֆեստ՚ փառատոնին առնչվող ֆինանսական խնդիրներ են ծագել

• Շաբաթ, 26 մայիսի, 18:15

Ֆինանսական խնդիրները, ըստ երևույթին, կարող են խանգարել ՙՀայֆեստ՚ միջազգային թատերական փառատոնի 10-ամյա հոբելյանը վառ կերպով նշելուն:

Ինչպես ԱրմԻնֆոյի թղթակցի հետ զրույցում պատմել է փառատոնի նախագահ Արթուր Ղուկասյանը, հոբելյանը նշելու նպատակով նախատեսվում էր ընդլայնել փողոցային ներկայացումների ծրագիրը: Սակայն խնդիրն այն է, որ ՙՀայֆեստ՚ փառատոնի կազմակերպիչներն առայժմ չեն կարողացել գտնել հովանավորի, որը պատրաստ է ծածկել անհրաժեշտ ծախսերը: ՙ10-ամյակի առնչությամբ մենք ցանկանում ենք պատրաստել հետաքրքիր ծրագիր, սակայն ամեն ինչի համար հարկավոր է փող, որը չկա: Մենք դրա հայթայթմամբ զբաղվում ենք արդեն, երևի, 4 ամիս՚, - պատմել է նա:

Նրա ասելով, փառատոնի բյուջեի հաշվին կարելի է ծածկել, թերևս, միայն դերասանների հոնորարները, բայց ահա նրանց ճանապարհածախսն ու դեկորացիաների փոխադրման ծախսերը հոգալը մեր ուժերից վեր խնդիր է: Չնայած այդ հանգամանքին, ՙՀայֆեստ՚ փառատոնի ծրագրերը վիթխարի են` սկսած չինական օպերայից և վերջացրած ծավալուն ֆրանսիական ներկայացումներով: Բանակցություններ են վարվում նաև Լեհաստանի, Գերմանիայի, Ռուսաստանի Սերբիայի, Շվեդիայի և ԱՄՆ թատերախմբերի հետ: