Վահրամ Աթանեսյան. Բաքուն հույս ունի ուժային ճանապարհով լուծել ղարաբաղյան հիմնախնդիրը` Իրանի գործերին Արևմուտքի ռազմական միջամտության դեպքում

• Շաբաթ, 26 մայիսի, 19:56

 ՙԱդրբեջանը դարձել է սեփական ապաշնորհ արտաքին քաղաքականության պատանդը, հույս փայփայելով, որ Իրանի գործերին Արևմուտքի ռազմական միջամտության դեպքում ինքը հնարավորություն կունենա ուժային ճանապարհով լուծել ղարաբաղյան հիմնախնդիրը՚, - լրագրողներին հայտարարել է ԼՂՀ ԱԺ արտաքին հարաբերությունների մշտական հանձնաժողովի նախագահ Վահրամ Աթանեսյանը:

Սակայն, կարծում է նա, Արևմուտքն Իրանին հարվածելու որոշում չի կայացնում, ուստի Բաքուն նյարդայնանում է: Ադրբեջանում կառավարող վարչակազմը տենդագին ՙպատերազմի պատրվակ է՚ փնտրում, արհեստականորեն լարելով իրավիճակը, որպեսզի Իրանի նյարդերը տեղի տան, և որպեսզի Իսրայելին հրահրի հարվածել` կասպյան տարածաշրջանում իր էներգետիկ շահերը պաշտպանելու նպատակով: Աթանեսյանի կարծիքով, այդպիսին է, կարծես, պաշտոնական Բաքվի դիրքորոշումը, այդպիսին է ադրբեջանական քաղտեխնոլոգների մտահղացումը: ՙԵս ենթադրում եմ, որ այդ մեծ խաղում Բաքուն կդառնա սոսկ ՙխաղազինվոր՚, եթե արդեն չի դարձել, քանի որ, կարելի է փաստել, որ Արևմուտքի արձագանքը բնավ համարժեք չէ ադրբեջանական ՙճուռակների՚ ակնկալիքներին միջազգային քաղաքականությունից: Իրանը բավականաչափ հաստատուն և հուսալի ռեսուրսներ ունի ինչպես երկրի ներսում, այնպես էլ միջազգային ասպարեզում, որպեսզի չդառնա հեշտ ավար այնպիսի չկայացած պետության համար, ինչպիսին, անկասկած, Ադրբեջանն է՚, - նշել է ԼՂՀ ԱԺ պատգամավորը: Կասպյան-սևծովյան տարածությունում ընդհանուր ռազմաքաղաքական և աշխարհառազմավարական իրադրությունն ապակայունացնելու Բաքվի փորձերն ի սկզբանե դատապարտված են ձախողման: ՙԺամանակակից աշխարհը կայունության և կանխատեսելիության կարիք ունի, իսկ եթե ինչ-որ տեղ անհանգիստ է, ապա այնտեղ Ադրբեջանի նման երկրներին ոչ ոք թույլ չի տա ոսկե ձկնիկ որսալ պղտոր ջրում: Թուրքիայի օրինակը, որին իր դաշնակիցները դուրս են թողնում մերձավորարևելյան ՙզբոսանավից՚, պետք է ուսանելի լինի Ադրբեջանի համար: Առավել ևս, որ Թուրքիայի և Ադրբեջանի հնարավորությունները միանգամայն անհամեմատելի են՚, - ամփոփել է պատգամավորը: