Հայաստանը, որպես ՀԱՊԿ լիիրավ անդամ, իրավունք ունի բազմակողմանի օգնություն ակնկալել ճգնաժամային իրավիճակներում: Այդ մասին հայտարարել է ՀԱՊԿ գլխավոր քարտուղար Նիկոլայ Բորդյուժան փետրվարի 21-ին Երևան-Մոսկվա տեսակամրջի ընթացքում:

ՙՀայաստանը կազմակերպության անդամ է` իր իրավունքներով ու պարտականություններով: Դա նշանակում է, որ ներդնելով իր ավանդը կառույցի գործունեությունում, կայունության և անվտանգության ապահովման գործում, նա միաժամանակ պետք է ակնկալի համանման օգնություն կազմակերպության անդամ մյուս պետություններից: Միևնույն ժամանակ, թե ՀԱՊԿ-ն ինչպես կարձագանքի, մասնավորապես, ղարաբաղյան հակամարտության առնչությամբ ճգնաժամային իրավիճակ ծագելու դեպքում, ապա այստեղ ամեն ինչ կախված է կոնկրետ իրադրությունից: Հարկավոր է հաշվի առնել, որ նման իրադրությունները տարբեր են լինում իրենց բնույթով, ձևաչափով, հետևաբար, միանշանակ կանխատեսումներ անելու հարկ չկա՚, - նշել է Բորդյուժան:

Նա ավելացրել է, որ ՀԱՊԿ-ը ներգրավված չէ ղարաբաղյան հակամարտության կարգավորման գործընթացում, ինչը, սակայն, չի խանգարում այդ կազմակերպությանը ակտիվորեն հետևել իրադարձությունների զարգացմանը, անցկացնել իրավիճակի մշտական դիտարկում: Նրա ասելով, որպես կարգավորման ձևաչափ գործում է ԵԱՀԿ ՄԽ ձևաչափը, ընդ որում, գործում է բավականին արդյունավետ` հաշվի առնելով խնդրի բարդությունը: ՙՄենք կարծում ենք, որ ԵԱՀԿ ՄԽ կատարում է իր գործառույթները, և որևէ կառույցի ներգրավումը կարգավորման գործընթացում միայն գործին կվնասի՚, - ամփոփել է ՀԱՊԿ գլխավոր քարտուղարը:

2012 թվականին ՀԱՊԿ կնշի իր 20-ամյա հոբելյանը: 1992 թվականի մայիսի 15-ին ստորագրված Հավաքական անվտանգության շուրջ պայմանագրի հիման վրա ձևավորված Հավաքական անվտանգության պայմանագրի կազմակերպության անդամ են Ռուսաստանը, Հայաստանը, Բելառուսը, Ղազախստանը, Ուզբեկստանը, Տաջիկստանն ու Ղրղըզստանը: 2012 թվականին ՀԱՊԿ նախագահությունը կանցնի Ղազախստանին: